قازاقستان تجم قۇتقارۋشىلارى جەر سىلكىنىسى سالدارىن جويۋعا كومەك كورسەتۋ ءۇشىن الماتىدان تۇركياعا اتتاندى. بۇل تۋرالى تجم حابارلادى.

ءتيىستى تاپسىرمانى قازاقستان پرەزيدەنتى قاسىم-جومارت توقاەۆ بەردى. بورت ءبىرىنشى كەزەكتە گازيانتەپ قالاسىنا بارادى.

جاساق قۇرامىندا قازاقستان تجم قۇتقارۋشىلارى، كينولوگيالىق ەسەپتەر جانە اپاتتار مەديتسيناسى ورتالىعىنىڭ مەديتسينا قىزمەتكەرلەرى بار.

تجم قۇتقارۋشىلارىنىڭ يەلىگىندە قۇتقارۋشى قۇرال-جابدىقتارى: گيدراۆليكالىق جانە پنەۆماتيكالىق جابدىقتار، گيدراۆليكالىق دومكراتتار، پنەۆمودومكراتتار، پەرفوراتورلار، جارىقتاندىرۋ قۇرالدارى، پالاتكالار، سپۋتنيكتىك تەرمينال، كاركاستى مودۋل، اۆتوتەحنيكا بار.

توپ قاجەتتى جابدىقتارمەن دە، قۇتقارۋ جۇمىستارىن جۇرگىزۋدە كوپ جىلدىق تاجىريبەسى بار قۇتقارۋشىلارمەن دە جابدىقتالعان.

مەملەكەت باسشىسى قاسىم-جومارت توقاەۆ تۇركيا پرەزيدەنتى رەجەپ تايپ ەردوعانعا كوڭىل ايتتى جانە ۇكىمەتكە تۇركياعا شۇعىل كومەك كورسەتۋدى تاپسىردى.

ءسىم مالىمەتى بويىنشا، قازىرگى ساتكە دەيىن وندا قازاقستان ازاماتتارى زارداپ شەكتى دەگەن اقپارات كەلىپ تۇسكەن جوق. سوڭعى مالىمەت بويىنشا تۇركيادا ءزىلزالا قۇرباندارىنىڭ سانى 3 مىڭعا جەتتى.

Abai.kz