الماتىداعى كرەماتوريدى اشۋ جانە پايدالانۋعا بەرۋ شامامەن 2023 جىلدىڭ ەكىنشى توقسانىنا شەگەرىلدى. بۇل تۋرالى قالالىق قۇرىلىس باسقارماسى ءمالىم ەتتى، دەپ حابارلايدى قازاقپارات ءتىلشىسى.

قۇرىلىس باسقارماسىنىڭ مالىمەتىنشە، تپ-10/0,4 كۆ جانە گاز قۇبىرىنىڭ تراسساسىن مونتاجداۋ جۇمىستارىن قوسپاعاندا، ينجەنەرلىك جەلىلەردى توسەۋ جۇمىستارى 80 پايىزعا ورىندالعان.

«2021 جىلدىڭ ەكىنشى توقسانىندا باعانىڭ سەرپىندى وسۋىنە بايلانىستى قۇرىلىس-مونتاجداۋ جۇمىستارىن جۇرگىزۋ كەزەڭىنە ترانسفورماتورلىق قوسالقى ستانتسيانىڭ سمەتالىق قۇنى وزگەردى. گاز قۇبىرىنىڭ باعىتى مەن جالعاۋ نۇكتەسى دە اۋىستىرىلدى. ىشكى مەملەكەتتىك اۋديت كوميتەتىنە ءوتىنىش جولدانىپ، جوبالىق-سمەتالىق قۇجاتتامانى تۇزەتۋگە كەلىسىم الىندى. جوبالاۋ ۇيىمى جوبانى تۇزەتۋ جۇمىستارىن جۇرگىزدى. قازىرگى ۋاقىتتا جەرگىلىكتى بيۋدجەت كوميسسياسىنىڭ حاتتاماسى بەكىتىلدى. جوبالاۋشىلار قورىتىندى الۋ ءۇشىن قۇجاتتامانى ساراپتاما پورتالىنا جۇكتەدى. ساراپتاما قورىتىندىسى بولجام بويىنشا وسى جىلدىڭ ناۋرىز ايىنىڭ باسىندا شىعادى. سودان كەيىن قۇرىلىس-مونتاجداۋ جۇمىستارى جۇرگىزىلەدى. وسىعان بايلانىستى نىساندى اشىپ، پايدالانۋعا بەرۋ كەيىنگە شەگەرىلىپ وتىر. بولجاممەن 2023 جىلدىڭ ەكىنشى توقسانىندا اشىلادى»، - دەپ حابارلادى قالالىق قۇرىلىس باسقارماسىنان.

ايتا كەتەيىك، كرەماتوريدىڭ قۇرىلىسى 2021 جىلدىڭ قىركۇيەگىندە اياقتالۋى ءتيىس ەدى. كەيىن سىرتقى ينجەنەرلىك جەلىلەردى، ونىڭ ىشىندە ورناتىلعان پەشتەردى پايدالانۋ ءۇشىن گازبەن جابدىقتاۋ جەلىسىن تارتۋ جۇمىستارىنا وراي، 2022 جىلدىڭ مامىرىنا جىلجىدى.

بىلتىر قاراشا ايىندا الماتى قالالىق قۇرىلىس باسقارماسى كرەماتوريدىڭ 2023 جىلدىڭ ءبىرىنشى توقسانىندا اشىلاتىنىن مالىمدەگەن ەدى.

ەسكە سالايىق، 2020 جىلدىڭ جازىندا كرەماتوري قۇرىلىسىنىڭ جوبالىق-سمەتالىق قۇجاتتارىن جاساۋعا تەندەر جاريالانعان بولاتىن. قۇرىلىس قۇنى – 1,3 ملرد تەڭگە. كرەماتوريدە ەكى پەشى بار ءبىر زال بولادى.

Abai.kz