گۇلميرا ساتىبالدىعا قاتىستى قىلمىستىق ءىس بويىنشا باسقا سوتتالۋشىلار سوت پروتسەسىن استانادا جالعاستىرۋعا قارسى بولدى، دەپ حابارلايدى Abai.kz  Halyq Uni-نە سىلتەمە جاساپ.

11 قاڭتاردا الماتىدا گۇلميرا ساتىبالدى ءىسى بويىنشا سوت پروتسەسى باستالدى.

سوتتا ساتىبالدىنىڭ ادۆوكاتى سوتتالۋشىنى ۇيقاماققا جىبەرۋدى سۇرادى جانە سوت پروتسەسىن استانادا جالعاستىرۋ تۋرالى ءوتىنىش ءبىلدىردى. سوت ادۆوكاتتىڭ ءوتىنىشىن ءىشىنارا قاناعاتتاندىردى. ساتىبالدىنى ۇيقاماققا جىبەرمەي، سوت پروتسەسىن استانا قالاسىندا جالعاستىرۋ تۋرالى قاۋلى شىعاردى.

الماتى سوتىنىڭ ءباسپاسوز قىزمەتىنىڭ حابارلاۋىنشا، بۇل قاۋلىعا پروكۋرور مەن سوتتالۋشىلاردىڭ ادۆوكاتتارى شاعىمداندى.

سوعان بايلانىستى قىلمىستىق ءىس الماتى قالاسى سوتىنىڭ اپەللياتسيالىق ينستانتسياسىنا شاعىمدى قاراۋ ءۇشىن جىبەرىلدى، - دەلىنگەن اقپاراتتا.

ايتا كەتەيىك، گۇلميرا ساتىبالدى، ونىڭ باقىلاۋىنداعى «اريا-جاڭا استانا» جشس-ءنىڭ باسشىلىعى جانە مەملەكەتتىك ورگانداردىڭ لاۋازىمدى تۇلعالارى وبەكتىلەردى سالۋعا بولىنگەن بيۋدجەت قاراجاتىن ۇرلادى دەگەن كۇدىككە ىلىنگەن. تەرگەۋ ساتىسىندا مەملەكەتكە كەلتىرىلگەن زالال تولىعىمەن وتەلدى.

گۇلميرا ساتىبالدى – قازاقستاننىڭ تۇڭعىش پرەزيدەنتى نۇرسۇلتان نازارباەۆتىڭ نەمەرە ءىنىسى قايرات ساتىبالدىنىڭ بۇرىنعى ايەلى. بۇعان دەيىن سوت ۇكىمىمەن قايرات ساتىبالدى 6 جىلعا باس بوستاندىعىنان ايىرىلدى.

Abai.kz