«الدىمەن، بورىشكەردىڭ جەكە شوتتارى مەن مۇلكى بۇعاتتالادى. شەتەلگە شىعۋىنا شەكتەۋ قويىلادى. ودان بولەك، سوت ارقىلى كولىك قۇرالىن باسقارۋ قۇقىعىنان ايىرىلادى. سونىمەن قاتار اليمەنت تولەۋدەن قاساقانا جالتارىپ جۇرگەندەرگە، اكىمشىلىك قۇقىق بۇزۋشىلىق كودەكسىنىڭ 669-بابىنا جانە قىلمىستىق كودەكستىڭ 139-بابىنا سايكەس اكىمشىلىك جانە قىلمىستىق جاۋاپكەرشىلىكتەر قاراستىرىلعان»، - دەلىنگەن ادىلەت مينيسترلىگىنىڭ رەسمي جاۋابىندا.

مينيسترلىكتىڭ اقپاراتىنشا، اليمەنت تولەمەي جۇرگەندەردىڭ ماسەلەسى زاڭ اياسىندا جەكە قارالادى.

«قىلمىستىق كودەكستىڭ 139-بابىنا سايكەس وتكەن جىلى 126 بورىشكەر قىلمىستىق جاۋاپقا تارتىلدى. سونىمەن قاتار 16 671 بورىشكەرگە سوت ورىنداۋشىسىنىڭ سوت سانكتسيالاعان قاۋلىسى نەگىزىندە «اتقارۋشىلىق ءىس جۇرگىزۋ جانە سوت ورىنداۋشىلارىنىڭ مارتەبەسى تۋرالى» زاڭىنىڭ 33-بابىنا سايكەس قازاقستان اۋماعىنان شىعۋىنا شەكتەۋ سالىندى. سونداي-اق اكىمشىلىك قۇقىق بۇزۋشىلىق تۋرالى كودەكستىڭ 669-بابىنا سايكەس 4 065 بورىشكەر اكىمشىلىك جاۋاپكەرشىلىككە تارتىلدى»، - دەيدى ۆەدومستۆودان.

Abai.kz