تالدىقورعاندا قاڭتار وقيعاسى كەزىندە 23 جابىرلەنۋشىنى ازاپتادى دەگەن ايىپپەن 5 ەكس-پوليتسەيگە قاتىستى ۇكىم شىقتى، دەپ جازادى Ulysmedia.kz.

بۇگىن 10 اقپاندا جەتىسۋ وبلىسىنىڭ تالدىقورعان قالالىق سوتىندا ازاپتاۋ فاكتىسى بويىنشا ك.، ن.، ت.، ب. جانە ج.-عا قاتىستى قىلمىستىق ءىس قارالدى. (قر قك-ءنىڭ 146-بابى، 2-بولىگى، 1,2,3,4-تارماقتارى).

«2022 جىلعى 6 قاڭتاردا پوليتسيا قىزمەتكەرلەرى تالدىقورعان قالاسى بويىنشا پوليتسيا باسقارماسىنىڭ اكىمشىلىك عيماراتىندا بولا وتىرىپ، ازاماتتىق كيىم كيىپ، مۇنداي ءىس-ارەكەتتەرىنىڭ قوعامعا قاۋىپتىلىگىن جانە ىقتيمال سالدارلارىن ءتۇسىنىپ، انتتى بۇزا وتىرىپ، قىلمىستىق كەلىسىمگە كەلىپ، كىناسىن مويىنداۋ جانە ءۇشىنشى تۇلعالارعا قاتىستى مالىمەتتەر الۋ ماقساتىندا ءبولىمنىڭ اكىمشىلىك عيماراتىنا شابۋىل جاساپ، قارۋ-جاراق پەن وق-دارىلەردى ۇرلادى دەگەن كۇدىككە ىلىنگەن تۇلعالارعا قاساقانا دەنە جانە پسيحيكالىق زارداپ كەلتىرىپ، سول ارقىلى 23 جابىرلەنۋشىگە ءارتۇرلى دارەجەدە دەنە جاراقاتىن سالعان. پروكۋرور ك.-عا 5 جىل، ن. مەن ت.-عا 4 جىل، ب. مەن ج.-عا 3 جىل باس بوستاندىعىنان ايىرۋ جازاسىن تاعايىنداۋدى سۇرادى»،- دەلىنگەن تالدىقورعان قالالىق سوتىنىڭ ءباسپاسوز قىزمەتى تاراتقان حابارلامادا.

ۆەدومستۆونىڭ اقپاراتىنا سايكەس، جابىرلەنۋشىلەر سوتتالۋشىلاردى كەشىرىپ، سوتتان ولاردى باس بوستاندىعىنان ايىرماۋدى سۇرادى.

سوتتالۋشىلار ك.، ن.، ت.، ب. جانە ج. كىنالارىن تولىق مويىنداپ، شارتتى تۇردە جازا تاعايىنداۋدى سۇرادى.

بۇل قىلمىس ءۇشىن زاڭ بويىنشا 3 جىلدان 7 جىلعا دەيىن باس بوستاندىعىنان ايىرۋ جازاسى كوزدەلگەن.

جەڭىلدەتەتىن ءمان-جايلار رەتىندە: كىنالارىن تولىق مويىنداۋى، كەلتىرىلگەن زياندى ءوز ەركىمەن وتەۋى، ك.، ن.، ب. جانە ج.-نىڭ اسىراۋىندا كامەلەتكە تولماعان بالالاردىڭ بولۋى تانىلدى.

اۋىرلاتاتىن ءمان-جايلار رەتىندە: قىلمىستىق قۇقىق بۇزۋشىلىقتىڭ توتەنشە جاعداي كەزىندە جاسالۋى جانە سوتتالۋشىلاردىڭ قابىلداعان انتتارىن بۇزۋى تانىلدى.

«سوت ك.، ن.، ت.، ب. جانە ج.-نى كىنالى دەپ تانىپ، 3 جىل مەرزىمگە قۇقىق قورعاۋ ورگاندارىندا قىزمەت اتقارۋ قۇقىعىنان ايىرا وتىرىپ، 3 جىلدان 4 جىلعا دەيىنگى مەرزىمگە باس بوستاندىعىنان ايىرۋ جازاسىن تاعايىندادى.

قازاقستان رەسپۋبليكاسى قىلمىستىق كودەكسىنىڭ 49-بابىنىڭ 1-بولىگى نەگىزىندە بارلىق سوتتالعاندار پوليتسيا قىزمەتكەرلەرىنىڭ ارناۋلى اتاعىنان ايىرىلدى»،- دەپ تولىقتىردى اتالعان ۆەدومستۆونىڭ ءباسپاسوز قىزمەتى.

Abai.kz