پرەمەر-ءمينيستردىڭ ءبىرىنشى ورىنباسارى رومان سكليار ەكىباستۇزعا جۇمىس ساپارىمەن كەلدى، دەپ حابارلادى Pavlodarnews.kz.

ساپار بارىسىندا رومان سكليار «پاۆلودارەنەرگو» اق باس ديرەكتورى ۆاديم لەسيننىڭ جۇمىسىن قاتاڭ سىنعا الدى.

ءبىرىنشى كەزەكتە ۇكىمەت توراعاسىنىڭ ءبىرىنشى ورىنباسارى سوڭعى ۇيلەردى جانە جالپى قالانى جىلۋمەن جابدىقتاۋدى رەتتەۋ ماسەلەسى قالاي شەشىلەتىنىن سۇرادى. الايدا «پاۆلودارەنەرگو» اق باس ديرەكتورى ۆاديم لەسيننىڭ جاۋابى ر. سكلياردىڭ كوڭىلىنەن شىقپادى.

«ءسىزدىڭ پارامەترلەرىڭىز ادامدارعا ەشتەڭە ايتپايدى، تۇرعىندار ءۇشىن ەڭ باستىسى پاتەرلەردە جىلى بولۋى كەرەك. 65-66 گرادۋس تەمپەراتۋرادا جانە دۇرىس گيدراۆليكالىق رەجيمدە پاتەرلەردە قالىپتى تەمپەراتۋراعا قول جەتكىزۋگە بولادى. بۇل ايتىپ وتىرعانىڭىز تۇككە جارامايدى. ءسىز ءتىپتى، مەنىڭ تاپسىرمالارىمدى ورىنداماق تۇگىلى ەشتەڭە تۇسىندىرە المايسىز»، – دەدى رومان سكليار.

پرەمەر-ءمينيسترىنىڭ ءبىرىنشى ورىنباسارى ۆاديم لەسينگە بۇگىن «پاۆلودارەنەرگو» اق اكتسيونەرلەرىنەن ونى اتقاراتىن قىزمەتىنەن بوساتۋدى تالاپ ەتەتىنىن جەتكىزدى. ءبىراز ۋاقىتتان كەيىن رومان سكليار «واەك» اق ديرەكتورلار كەڭەسىنىڭ مۇشەسى سەرگەي كانمەن تەلەفون ارقىلى سويلەسكەن كەزىندە بۇل ماسەلە تۇپكىلىكتى شەشىلدى.

ايتا كەتەيىك، رومان سكليار ەكىباستۇزعا جۇمىس ساپارى اياسىندا قالانىڭ الەۋمەتتىك نىساندارىنا بارىپ، بىرقاتار كەزدەسۋلەر وتكىزەدى.

ەسكە سالايىق، ۆاديم لەسين بىرەر كۇن بۇرىن وتكەن ءباسپاسوز ءماسليحاتىندا ەكىباستۇز قالاسىن جىلۋمەن تۇراقتى قامتۋ پروبلەماسى جىلىتۋ ماۋسىمى اياقتالعانعا دەيىن شەشىمىن تاپپاۋى مۇمكىن ەكەنىن ايتقان بولاتىن.

قازىر قالاداعى جەو-دا نەبارى ءتورت قازاندىق جۇمىس ىستەيدى، التاۋى جوندەۋدە. تەمپەراتۋرانىڭ شىعاتىن پارامەترى – 60 گرادۋس، كەرى اينالىمدا - 44. ەكىباستۇز تۇرعىندارىنا جىلۋ اقىسىنا 70 پايىز جەڭىلدىك جاسالدى.

Abai.kz