قر پرەمەر-ءمينيسترىنىڭ ورىنباسارى التاي كولگىنوۆ دەپۋاتاتتىق ساۋالعا جولداعان جاۋابىندا ەلدى مەكەندەر مەن كوشەلەرگە كىسى ەسىمىن بەرۋدىڭ ءتارتىبىن ءتۇسىندىردى.

ەكس-سەناتور مۇرات باقتيارۇلى قر پرەمەر-ءمينيسترىنىڭ ورىنباسارى التاي كولگىنوۆتىڭ اتىنا جولداعان ساۋالىندا كوشەلەرگە ات بەرۋدە جانە ەلدى-مەكەندەردىڭ كەيبىرەۋلەرىن قايتا اتاۋدا بەلگىلى ءبىر ءتارتىپتىڭ جوقتىعىن ايتقان بولاتىن. وسىنىڭ كەسىرىنەن كەڭەستىك كەزەڭدە اۋدان مەن وبلىس باسقارعان بۇرىنعى كومپارتيانىڭ ءبىرىنشى حاتشىلارى مەن كەڭەس توراعالارى، سوۆحوز، مەكەمە ديرەكتورلارىنىڭ اتتارىنا كوشە سۇراۋ ءجيى كەزدەسەتىنىن پروبلەما ەتىپ كوتەرگەن.

ۆيتسە-پرەمەردىڭ جاۋابىندا ەلدى مەكەن مەن كوشەلەرگە كىسى ەسىمىن بەرۋ ءۇشىن ارنايى ءتىزىم جاساقتالعانى ايتىلعان.

«ورتاق تاريحي سانانى قالىپتاستىرۋ جانە بىرىزدىلىكتى قامتاماسىز ەتۋ ءۇشىن 2021 جىلعى قىركۇيەكتە رەسپۋبليكالىق ونوماستيكا كوميسسياسى مەملەكەت پەن قوعامنىڭ دامۋىنا زور ۇلەس قوسقان قايراتكەرلەر قاتارىنان «تاريحي تۇلعالار» ءتىزىمىن قالىپتاستىردى. اتاۋلاردى وزگەرتۋ كەزىندە ونوماستيكا كوميسسيالارى «تاريحي تۇلعالار» تىزىمىنە ەنگەن ەسىمدەردى پايدالانادى»، - دەپ جازادى التاي كولگىنوۆ.

Abai.kz