قر پرەزيدەنتىنىڭ "بايقوڭىر" كەشەنىندەگى ارناۋلى وكىلىنىڭ قىزمەتىن قامتاماسىز ەتۋ باسقارماسى ۋكرايناعا قارسى سوعىسقا قاتىسقىسى كەلەتىندەرگە اقشا ۇسىنىلعانى تۋرالى اقپاراتقا تۇسىنىكتەمە بەردى، دەپ جازدى Ulysmedia.kz.

تاياۋدا قالا پروكۋراتۋراسى سوعىسقا قاتىسۋعا نيەتتىلەرگە 260 مىڭ رۋبل (1,5 ملن تەڭگەدەن استام) كولەمىندە وتەماقى تاعايىندالاتىنى جونىندە حابارلاما تاراتقان.

بايقوڭىر قالاسىنىڭ ارنايى وكىلدىگىنىڭ Facebook-تەگى رەسمي پاراقشاسىندا جاريالانعان اقپاراتقا سايكەس، موبيليزاتسيالاۋ جانە تولەمدەر تۋرالى اقپارات بايقوڭىر اۋماعىندا ورنالاسقان رەسەي فەدەراتسياسىنىڭ ازاماتتارىنا عانا قاتىستى.

بايقوڭىر قالاسى اكىمشىلىگى باسشىسىنىڭ 2023 جىلعى 7 اقپانداعى №49 قاۋلىسىنا سايكەس، بايقوڭىر قالاسىندا تۇراتىن ازاماتتارعا، سونداي-اق ارنايى اسكەري وپەراتسياعا قاتىسۋعا نيەت بىلدىرگەن جانە اسكەري قىزمەتتى وتكەرۋگە كەلىسىمشارت جاساسقان ادامدارعا الەۋمەتتىك قولداۋ شاراسى رەتىندە 260 مىڭ رۋبل مولشەرىندە بىرجولعى اقشالاي تولەم بەلگىلەنگەن. رەسەي فەدەراتسياسى پرەزيدەنتىنىڭ 21.09.2022 جىلعى №647 «رەسەي فەدەراتسياسىندا ءىشىنارا جۇمىلدىرۋ جاريالاۋ تۋرالى» جارلىعىنا سايكەس، تەك رەسەي فەدەراتسياسىنىڭ ازاماتتارى اسكەري قىزمەتكە شاقىرىلادى. سونداي-اق ەرىكتى تۇردە اسكەري قىزمەتشى رەتىندە جۇمىلدىرۋ نەمەسە ارنايى اسكەري وپەراتسياعا قاتىسۋ ءۇشىن رەسەي فەدەراتسياسىنىڭ 60 جاسقا دەيىنگى ەر-ازاماتتارى شاقىرىلۋى مۇمكىن، - دەلىنگەن حابارلامادا.

ناقتى ايتقاندا، قاۋلىعا سايكەس، الەۋمەتتىك قولداۋ شاراسى رەتىندە 260 مىڭ رۋبل مولشەرىندەگى بىرجولعى اقشالاي تولەم تەك بايقوڭىر قالاسىنىڭ تۇرعىنى بولىپ تابىلاتىن رەسەي فەدەراتسياسىنىڭ ازاماتتارىنا عانا تاعايىندالماق.

Abai.kz