قازاقستاندىق قۇتقارۋشىلار تۇركيادا ىزدەۋ-قۇتقارۋ جۇمىستارىن باستاعالى 7 ادامدى قۇتقاردى. سونداي-اق قايتىس بولعان 88 ادامنىڭ (10 بالا) ءمايىتىن ءۇيىندى استىنان شىعاردى، دەپ حابارلادى قر توتەنشە جاعدايلار مينيسترلىگىنىڭ باسپاسوز قىزمەتى.

قر توتەنشە جاعدايلار مينيسترلىگى اپاتتار مەديتسيناسى ورتالىعىنىڭ دارىگەرلەرى زارداپ شەككەندەرگە تاۋلىك بويى مەديتسينالىق كومەك كورسەتۋدە. وسىعان دەيىن 140-تان استام جەرگىلىكتى تۇرعىنعا، سونىڭ ىشىندە 17 بالاعا مەديتسينالىق كومەك كورسەتىلدى. ولاردىڭ ىشىندە سترەستىڭ جەدەل رەاكتسياسىمەن، سالقىن تيۋ، تىنىس الۋ جولدارىنىڭ اۋرۋلارىمەن، سونداي-اق ءارتۇرلى جاراقاتتارمەن بايلانىستى اۋرۋلار باسىم.

ىزدەستىرۋ جۇمىستارى باستالعالى جەدەل شتاب جۇمىس ىستەپ تۇر. ونىڭ ماقساتى توتەنشە جاعداي ايماعىنداعى جاعداي تۋرالى دەرەكتەردى جيناۋ، وڭدەۋ جانە تالداۋ، قاجەتتى اقپاراتتى بەرۋ، توتەنشە جاعدايدىڭ كۇردەلەنۋىن جانە ولاردىڭ سالدارىن بولجاۋ، توتەنشە جاعدايمەن كۇرەس بويىنشا جەدەل شەشىم قابىلداۋ ءۇشىن ۇسىنىستار دايىنداۋ بولىپ تابىلادى.

قازىرگى ۋاقىتتا قازاقستاندىق قۇتقارۋشىلار ەكى ەلدى مەكەندە ىزدەۋ-قۇتقارۋ جۇمىستارىن جۇرگىزىپ جاتىر. قيراعان ۇيلەردىڭ ورنىنداعى ۇيىندىلەردىڭ اراسىن اشۋ جۇمىستارى جۇرگىزىلىپ جاتىر. قۇتقارۋشىلار تۇراقسىز قۇرىلىمداردى بولشەكتەۋ جانە ارنايى كەسكىشتىڭ كومەگىمەن جول تازارتۋ جانە قيراندىلاردىڭ استىنان زارداپ شەككەندەردى ىزدەۋدى جەڭىلدەتۋ ءۇشىن ۇيىندىلەردىڭ استىنداعى ارماتۋرانى كەسۋ جۇمىستارى جۇرگىزۋدە. بۇل بەتون، ارقالىقتار جانە باسقا دا قۇرىلىس قالدىقتارىن بولشەكتەپ، ارنايى تەحنيكاعا جۇكتەۋدى جەڭىلدەتۋ ءۇشىن جاسالادى.

گازيانتەپ قالاسى ءبىرىنشى ەشەلونمەن بارعان قۇتقارۋشىلار تاۋلىك بويى ەكى اۋىسىمدا ەكى ۋچاسكەدە جۇمىس ىستەپ جاتىر.

قۇتقارۋشىلاردىڭ ءبىر توبى توعىز قاباتتى عيماراتتا جۇمىس جۇرگىزۋدە. عيمارات تولىعىمەن قيراعان. ۇيىندىلەردىڭ اراسىنان ادامداردى ىزدەۋ جۇمىستارى جالعاسۋدا. بۇل جەردە ۇيىندىلەردىڭ استىنان 4 ادام قۇتقارىلدى، 30 ادامنىڭ دەنەسى شىعارىلدى.

قۇتقارۋشىلاردىڭ باسقا توبى التى قاباتتى عيماراتتا جۇمىس جۇرگىزۋدە. عيمارات تولىعىمەن قيراعان. ۇيىندىلەردىڭ اراسىنان ادامداردى ىزدەۋ جۇمىستارى جۇرگىزىلۋدە، 24 ادامنىڭ دەنەسى شىعارىلدى.

قازاقستانن تجم ەكىنشى ەشەلونمەن بارعان قۇتقارۋشىلار تۇركياعا كەلگەن ساتتەن باستاپ نۋرداگى قالاسىندا ىزدەۋ-قۇتقارۋ جۇمىستارىن تاۋلىك بويى جۇرگىزۋدە. تولىعىمەن قيراعان عيماراتتا قازاقستاندىق قۇتقارۋشىلار ادامداردىڭ ورنالاسقان جەرى مەن جاي-كۇيىن انىقتاۋ، ۇيىندىلەر استىندا زارداپ شەككەندەرمەن اۋديو بايلانىس ورناتۋ، قاجەتتى كومەكتىڭ كولەمى مەن سيپاتىن انىقتاۋ بويىنشا جۇمىستار جۇرگىزدى.

قازاقستاندىق قۇتقارۋشىلار وتە تەرەڭدە جاتقان ۇيىندىلەردىڭ استىنان زارداپ شەككەندەردى ەۆاكۋاتسيالاۋ ءۇشىن جول اشۋ جۇمىستارىن ورىنداپ، 18 مىڭ تەكشە مەتردەن استام ءۇيىندىنىڭ استىنان ءۇش ءتىرى ادامدى - ەر ادام مەن ەكى ايەلدى شىعاردى. قايتىس بولعان 11 ادامنىڭ دەنەسى شىعارىلدى. زارداپ شەككەن ادامداردى ىزدەۋگە تەحنيكالىق قۇرالدار، ۇيىندىلەردى بولشەكتەۋگە ينجەنەرلىك تەحنيكا پايدالانىلۋدا. ۇيىندىلەردىڭ اراسىنان ادامداردى ىزدەۋ جۇمىستارى جۇرگىزىلۋدە.

Abai.kz