قىرعىز رەسپۋبليكاسىنىڭ ەكس-پرەزيدەنتى المازبەك اتامباەۆ قاماۋدان بوساپ شىققان سوڭ باق وكىلدەرىنە قازىرگى جاعدايى مەن العا قويعان ماقسات-مىندەتى تۋرالى سۇراققا جاۋاپ بەردى، دەپ جازادى halyq-uni.

ءباسپاسوز ءماسليحاتى المازبەك اتامباەۆتىڭ قوي-تاش اۋىلىنداعى رەزيدەنتسياسىندا بولدى. جيىن باستالا بەرىسىمەن ول سۇراق كۇتپەي، اقشاسىنىڭ كوپ ەكەنىن ماقتانىشپەن ايتتى.

مەن ميللياردەر ەمەسپىن. مۋلتيميللياردەرمىن. رايدىڭ (زايىبى رايسا اتامباەۆا، - رەد.) ەسەپشوتىندا ءالى اقشا بار. بىراق ول بۇعاتتاۋلى. ماعان سەنسەڭىز، ءبىزدىڭ بۇل ءۇيىمىز، 90-جىلدارى ساتىپ العان جەرىمىمىز جاقسى اقشا تۇرادى. ونىڭ ۇستىنە، ءوزىم سالعان مەشىت تەرريتوريامدا تۇر. ول – مەنىڭ جەكەمەنشىگىم. كەيبىرەۋلەر مەشىتكە نەگە ەكى گەكتار جەر بەرگەنىمە اشۋلانادى. ولار ماعان قوماقتى اقشا ۇسىندى. مەن شىن مانىسىندە باي اداممىن، – دەپ باستادى اڭگىمەسىن المازبەك اتامباەۆ.

وسىدان كەيىن ول جۋرناليستەردىڭ قاماۋدا بولعاندا كىمدەردىڭ كومەكتەسكەنىن، بوستاندىققا شىققان سوڭ نەمەن اينالىساتىنىن، بولاشاققا قانداي جوبا-جوسپارلار قۇرىپ وتىرعانىن، جالپى العا قويعان ماقسات-مىندەتى بار ما ەكەن دەگەن سۇراقتار قويىپ، ولارعا تۇششىمدى، ياعني سالماقتى جاۋاپ الدى.

قىرعىزستاننىڭ بۇرىنعى پرەزيدەنتى ءوز سوزىندە الدىمەن قاماۋدا وتىرعاندا كومەك بەرىپ، قولداۋ كورسەتكەن بارلىق ازاماتقا العىس ايتتى.

ماعان الدىمەن قاراپايىم حالىق كوپ كومەكتەستى. تۇرمەگە قامالعاندا رايسا ءوزى ساۋدا جاساپ ءجۇردى. سول كەزدە ودان جەمىس-جيدەك ءۇشىن ەشكىم اقشا الماعان ەكەن. بىزگە حالىق بارلىق جەردە جاقسى قارايتىنىن ءبىلدىم. قاراپايىم حالىق مورالدىق جاعىنان دا، ماتەريالدىق جاعىنان دا كومەكتەستى. مەنىڭ ايەلىمنىڭ اقشادان قىسىلعان كەزى بولدى. قاراپايىم ادامدار كەزدەسىپ، وعان 500-1000 سوم بەرگەن ەكەن. مەن قاراپايىم وتانداستارىما العىس ايتامىن. ويتكەنى ولارعا سەنۋگە بولادى. ولار كەيبىر ساياساتكەرلەرگە ۇقسامايدى، ەشقاشان ساتپايدى، –  دەدى ول.

المازبەك اتامباەۆ ەمدەلگەننەن كەيىن نەمەن اينالىساتىنىن، العا قويعان ماقساتى تۋرالى ساۋالعا: «ءبارىن ۋاقىت كورسەتەدى»، – دەپ قىسقاشا جاۋاپ قايىردى. ودان كەيىن ءسوز اراسىندا جۋرناليستەردىڭ ۇستىنەن ارىز جازعانىنا وكىنەتىنىن، سول كەزدە قاتتى قاتەلىك جاساعانىن ايتىپ قالدى.

مەن پرەزيدەنت بولعان كەزىمدە قاتەلىك جاسادىم. ونى ەندى ءتۇسىندىم. ءباسپاسوزدىڭ بوستاندىعى بولۋ كەرەك. پرەزيدەنت بولا تۇرا جۋرنالستەردىڭ ۇستىنەن ارىز جازىپ، سوتقا بەردىم. مەملەكەت باسشىسىنا سوتقا بەرۋ جاراسپايدى. ويتكەنى ءبارىبىر سوت پرەزيدەنتتىڭ كوڭىلىنە قاراپ، ونىڭ تالابىن ورىندايدى. مەنىڭ جۋرناليستەردى سوتقا بەرگەنىم دۇرىس بولمادى. سوعان وكىنەمىن، –  دەدى ول.

كەشە قىرعىز رەسپۋبليكاسىنىڭ ەكس-پرەزيدەنتى بوستاندىققا شىققان بولاتىن. وعان بىشكەك قالاسىنىڭ پەرۆوماي اۋداندىق سوتىنىڭ شەشىمىمەن ەمدەلۋ ءۇشىن شەت ەلگە شىعۋعا رۇقسات بەرىلدى.

Abai.kz