ءمينيستردىڭ ايتۋىنشا، جۋىردا الەۋمەتتىك ماڭىزى بار نەگىزگى ازىق-تۇلىكتىڭ 19 ءتۇرى ارزانداي باستايدى.

ء"بىرىنشى كەزەكتە، تاپشىلىققا جول بەرمەۋىمىز كەرەك. ەكىنشىدەن، باعانى تۇراقتى ۇستاۋ كەرەك. ۇشىنشىدەن، ارزانداتۋعا قاراي باعىت بۇرۋىمىز كەرەك. اقپان-ناۋرىزدا ارزانداتۋ ترەندىنە جول اشامىز. جۇرتقا ازىق-تۇلىك جەتكىلىكتى ەكەنىن، بايبالام جاساۋعا بولمايتىنىن تۇسىندىرەيىك. الاڭداۋعا نەگىز جوق" دەدى مينيستر.

ونىڭ ايتۋىنشا، ەلدەگى دۇكەندەرگە تۇراقتاندىرۋ قورلارىنان اكىمدىك بەلگىلەگەن باعا بويىنشا ازىق-تۇلىك تۇسەدى. بۇل باعا ينفلياتسيانى تەجەۋگە مۇمكىندىك بەرەدى.

ساۋدا ءمينيسترىنىڭ ايتۋىنشا، پاكىستاننان قازاقستانعا ەكى جۇك كولىگىمەن كارتوپ اكەلىنىپ، پياز باعاسى تۇراقتاندىرىلعان. بۇعان قوسا، كۇنباعىس مايى بويىنشا مەموراندۋم جاسالىپ، جۇمىرتقا وندىرۋشىلەرمەن كەلىسسوز جۇرگىزىلمەك.

كەيىنگى ايلاردا قازاقستاندا ينفلياتسيا ۇزدىكسىز ءوسىپ جاتقانى حابارلاندى. ۇكىمەت قىمباتشىلىققا قارسى شارالاردى ءجيى ايتادى.

2022 جىلدىڭ قورىتىندىسى بويىنشا، ەلدە ينفلياتسيا كورسەتكىشى 20,3 پايىز بولعان. بۇعان ءبىرىنشى كەزەكتە ازىق-تۇلىك قىمباتتاعانى ء(بىر جىلدا 25,3 پايىز قىمباتتاعان) ىقپال ەتكەن.

ەڭبەك مينيسترلىگى ەلدە ينفلياتسيانىڭ سالدارىنان تابىسى ازايعان الەۋمەتتىك كومەككە مۇقتاج ازاماتتار كوبەيگەنىن ايتقان.

Abai.kz