بيزنەسمەن قايرات بورانباەۆ بۇگىنگى سوت وتىرىسىنا دا قاتىسا المادى، دەپ جازادى Ulysmedia.kz.

استانا قالاسى سارىارقا اۋدانىنىڭ №2 سوتىنىڭ سۋدياسى نازگۇل باپاقوۆا 16 اقپاندا قايرات بورانباەۆ دەنساۋلىعىنا بايلانىستى سوت زالىنا كەلۋدەن باس تارتقانىن ايتتى. ۋاقىتشا وقشاۋلاعىشتا بورانباەۆتى تەكسەرگەن دارىگەر ونىڭ دەنساۋلىعىنا «اۋىرلىعى ورتاشا» دەگەن قورىتىندىعا كەلىپ، وعان نەۆروپوتولوگ پەن نەيروحيرۋرگقا قارالۋعا كەڭەس بەرگەن.

سوت بورانباەۆتىڭ ەتاپپەن نە ءۇشىن سوت زالىنا كەلمەگەنىن ءبىلۋ ءۇشىن №64 ۋاقىتشا قاماۋ وقشاۋلاعىشىنا حات جولداعان. كەلگەن جاۋاپتا «دەنساۋلىق جاعدايىنىڭ اۋىرلىعى ورتاشا بولعاندىقتان، ونى اكەلۋ مۇمكىن بولماي تۇرعانى» جازىلىپ، مەكەمە سوتتى استانا اكىمدىگىنە قاراستى «دوستىق» العاشقى مەديتسينالىق-سانيتارلىق كومەك ورتالىعىنا باعىتتاعان. ول ورتالىق سوتقا بورانباەۆتىڭ دەنساۋلىق جاعدايى جونىندە ناقتى جاۋاپ بەرمەگەن.

دوستىق ورتالىعىنا سوتتان ساۋالحات 17 اقپاندا قايتادان جولداندى.

«ونى نەۆرولوگ قارادى. نەۆرولوگتىڭ قورىتىندىسى بويىنشا، بورانباەۆ وزدىگىمەن جۇرە الادى. الايدا وعان توسەكتە جاتىپ ەمدەلۋگە كەڭەس بەرىلگەن. بورانباەۆتىڭ دەنساۋلىق جاعدايىن ەسكەرە كەلە سوت وتىرىستى دۇيسەنبى ساعات ونعا اۋىستىرۋدى ءجون كورەدى. سوت ءىسى دۇيسەنبى، سەيسەنبى مەن سارسەنبىدە قارالادى. وعان قوسا بەيسەنبى مەن جۇمادا دا»، - دەدى سۋديا باپاقوۆا.

ەسكە سالا كەتەيىك، تەرگەۋ نۇسقاسى بويىنشا، 2019 جىلى قايرات بورانباەۆ، رومان ناحانوۆ، تايىر جانۇزاق پەن يبۋللا سەردى وزدەرىنىڭ باقىلاۋىنداعى «ازياگاز چۋندجا» جشس ارقىلى Qazaq Gaz ۇلتتىق كومپانياسىنان (بۇرىنعى قازترانسگاز) گاز تاسىمالداۋ كەزىندە قاراجات جىمقىرعان. ىستە پروكۋرورلار جىمقىرىلعان سوما كولەمى 14,5 ملرد تەڭگە ەكەنىن ايتادى.

ءۇش ايىپتالۋشى – قايرات بورانباەۆ، رومان ناحانوۆ، تايىر جانۇزاق وزىنە تاعىلعان ايىپپەن كەلىسپەيدى. يبۋللا سەردى شەت ەلدەردىڭ بىرىندە بىلتىردان بەرى بوس تاسالاپ ءجۇر.

قايرات بورانباەۆتى قولداۋعا وتكەن وتىرىستاردا ماسكەۋدەن مۋز-تۆ باسشىسى ارمان داۋلەتياروۆ، الماتىدان انشىلەر بايعالي سەركەباەۆ پەن ناعيما ەسقاليەۆا كەلگەن. تانىمال كۋاگەرلەر سوتتان بورانباەۆقا قاتىستى بۇلتارتپاۋ شاراسىن وزگەرتۋدى، ونى قاماۋدان ۇيقاماققا جىبەرۋدى ءوتىنىپ، كەرەك بولسا ول ءۇشىن كەپىل بولا الاتىندارىن ايتقان بولاتىن.

Abai.kz