ءماجىلىس پەن ءماسليحات دەپۋتاتتارىنىڭ سايلاۋ ناۋقانىندا ۇگىت جۇمىستارىنا رۇقسات بەرىلمەي جاتىپ، ناسيحاتپەن اينالىسقاندار جاۋاپقا تارتىلدى. بۇل تۋرالى ورتالىق سايلاۋ كوميسسياسىنىڭ وتىرىسىنا قاتىسقان باس پروكۋروردىڭ ورىنباسارى جاندوس ومىراليەۆ ءمالىم ەتتى، دەپ حابارلايدى قازاقپارات ءتىلشىسى.

«بۇگىنگى تاڭدا سايلاۋ بويىنشا قوعامدىق پىكىرگە ساۋالناما جۇرگىزۋدىڭ، سونداي-اق سايلاۋ الدىنداعى ۇگىتتى جۇرگىزۋدىڭ بەلگىلەنگەن ءتارتىبى مەن شارتتارىن ساقتاماۋمەن ۇشتاسقان بىرقاتار زاڭ بۇزۋشىلىقتار تىركەلدى. ولاردىڭ بىرەۋى ەلوردادا بولعان. كىنالى ادامعا استانا قالاسى سارىارقا اۋدانى پروكۋرورىنىڭ قاۋلىسىمەن قىسقارتىلعان ءىس جۇرگىزۋ تارتىبىندە اكىمشىلىك قۇقىق بۇزۋشىلىق تۋرالى كودەكستىڭ 120-بابى 3-بولىگى بويىنشا 7,5 اەك مولشەرىندە اكىمشىلىك ايىپپۇل سالىندى»، - دەدى جاندوس ومىراليەۆ.

بۇعان قوسا، كانديداتتار مەن پارتيالىق تىزىمدەردى تىركەۋ اياقتالعانعا دەيىن ۇگىت جۇرگىزگەن 5 زاڭ بۇزۋشىلىق فاكتىسى انىقتالعانىن اتاپ ءوتتى.

«بىرەۋى بويىنشا تالدىقورعان قالاسىنىڭ تۇرعىنى WhatsApp مەسسەندجەرىندە ۇگىت جۇرگىزگەنى ءۇشىن سوت قاۋلىسىمەن ايىپپۇل تۇرىندە اكىمشىلىك جازاعا تارتىلدى. قالعاندارى بويىنشا كىنالىلەردى وسى باپپەن جاۋاپقا تارتۋ جونىندەگى شارالار قابىلدانىپ جاتىر»، - دەپ توقتالدى باس پروكۋروردىڭ ورىنباسارى.

ول انىقتالعان زاڭ بۇزۋشىلىق فاكتىلەرى بويىنشا ءتيىستى زاڭنامادا كوزدەلگەن قۇقىقتىق شارالار قابىلداناتىنىن ەسكەرتتى.

Abai.kz