پرەمەر-ءمينيسترى ءاليحان سمايىلوۆ ءىرى شەتەلدىك كومپانيالاردىڭ، ديپلوماتيالىق كورپۋس پەن ورتالىق مەملەكەتتىك ورگانداردىڭ جانە «اتامەكەن» ۇكپ وكىلدەرىنىڭ قاتىسۋىمەن ينۆەستيتسيالىق احۋالدى جاقسارتۋ جونىندەگى كەڭەستىڭ كەزەكتى وتىرىسىن وتكىزدى، دەپ حابارلادى Halyq Uni.

ءاليحان سمايىلوۆ سىرتقى سىن-قاتەرلەرگە قاراماستان، 2022 جىلدىڭ قورىتىندىسى بويىنشا قازاقستان ەكونوميكاسى وڭ ءوسۋ قارقىنىن كورسەتىپ، ينۆەستيتسيالىق تارتىمدىلىعىن ساقتاپ قالعانىن اتاپ ءوتتى. اتاپ ايتقاندا، وتكەن جىلدىڭ 9 ايىندا رەسپۋبليكاعا تارتىلعان تىكەلەي شەتەلدىك ينۆەستيتسيالاردىڭ جالپى كولەمى 17,8%-عا ءوسىپ، $22,1 ملرد-تى قۇرادى.

جاڭا ەكونوميكالىق جاعدايدا ۇكىمەت شەتەلدىك ينۆەستورلاردىڭ جۇمىسى ءۇشىن قولايلى جاعداي جاساپ كەلەدى. بيزنەس-جوبالارعا تۇراقتى نەگىزدە فيسكالدىق جانە فيسكالدىق ەمەس جەڭىلدىكتەردى، سونداي-اق پرەفەرەنتسيالاردى قامتيتىن جان-جاقتى قولداۋ كورسەتىلىپ وتىر، — دەدى ۇكىمەت باسشىسى.

قولداۋدىڭ جاڭا قۇرالدارى تۋرالى ايتا وتىرىپ، پرەمەر-مينيستر ينۆەستيتسيالىق مىندەتتەمەلەر تۋرالى كەلىسىمدى، جاقسارتىلعان مودەلدىك كەلىسىمشارتتى جانە ينۆەستيتسيالار تۋرالى كەلىسىم جاساۋ پروتسەسىن جەڭىلدەتۋدى اتاپ كورسەتتى.

پرەمەر-ءمينيستردىڭ ايتۋىنشا، قازاقستاننىڭ ينۆەستيتسيالىق تارتىمدىلىعىن جاقسارتۋدىڭ تاعى ءبىر ماڭىزدى قىرى – بولجاۋعا بولاتىن جانە اشىق سالىق ساياساتى. وسىعان بايلانىستى فيسكالدىق رەتتەۋدى قايتا قاراۋ ءۇشىن جاڭا سالىق كودەكسى ازىرلەنىپ جاتىر. ول سالىقتىق باقىلاۋدى تسيفرلاندىرۋدى، سارالانعان مولشەرلەمەلەرگە كوشۋدى، تەحنولوگيالىق جاڭعىرتۋدى ىنتالاندىرۋدى، ارناۋلى سالىق رەجيمدەرىن وڭايلاتۋدى جانە ت. ب. كوزدەيدى.

وتىرىس اياسىندا قاتىسۋشىلار بيزنەس ءۇشىن اكىمشىلىك كەدەرگىلەردى جويۋ، سالىق سالۋدى جەتىلدىرۋ، جاڭا تەحنولوگيالاردى دامىتۋ، جاھاندىق ەكونوميكالىق ترەندتەردىڭ قازاقستان ەكونوميكاسىنا اسەرى جانە ت.ب. ماسەلەلەردى تالقىلادى.

شارا قورىتىندىسى بويىنشا پرەمەر-مينيستر ۇكىمەتتىڭ ءوزارا ءتيىمدى ىنتىماقتاستىقتى ارتتىرۋعا باعىتتالعان پىكىرتالاستارعا، ۇسىنىمدارعا جانە جاڭا جوبالارعا اشىق ەكەنىن اتاپ ءوتتى.

ءبىز قازاقستاننىڭ ينۆەستيتسيالىق كليماتىن جاقسارتۋعا بەلسەندى تۇردە قاتىسىپ جاتقان شەتەلدىك ارىپتەستەر مەن ديپلوماتيالىق كورپۋستىڭ جۇمىسىن جوعارى باعالايمىز. ءوز تاراپىمىزدان كەلەشەگى بار جوبالارعا قاجەتتى قولداۋ كورسەتۋگە دايىنبىز، — دەپ تۇيىندەدى ءاليحان سمايىلوۆ.

Abai.kz