جسدپ «امانات» پارتياسىنىڭ باستاماسىمەن ىسكە اسقان ءادىل سايلاۋ وتكىزۋ تۋرالى مەموراندۋمعا قول قويمادى. پارتيانىڭ نەلىكتەن كەلىسىمگە كەلمەگەنىن ءماجىلىس دەپۋتاتتىعىنا ۇمىتكەر نۇرلان اۋەسباەۆ الەۋمەتتىك جەلىدە جاريالاعان ۆيدەو ۇندەۋىندە ءتۇسىندىردى.

«جسدپ-نىڭ «Amanat» پارتياسىنىڭ مەموراندۋم جاساسۋ ۇسىنىسى بويىنشا جاۋابى:

جسدپ وپپوزيتسيالىق پارتياسىنىڭ ءبىرشاما تاريحى بار جانە ول ارقاشاندا ساياسي كۇرەس قازانىندا قايناپ، سايلاۋعا قاتىسىپ تۇرادى.

وسى كۇنگە دەيىن ءبىز بيلىكپەن، اسىرەسە، ونىمەن تىكەلەي بايلانىستى پارتيالارمەن ەشبىر كەلىسىمگە قول قويعان ەمەسپىز.

وپپوزيتسيا بيلىكتىڭ قۋىرشاعى، جالعان ساياسي ويىنداردىڭ قاتىسۋشىسى بولعان ەمەس، بولمايدى دا. ەكىجۇزدىلىك تانىتۋ قولىمىزدان كەلمەيدى.

ءبىز سەكىلدى وپپوزيتسيالىق پارتيا ءۇشىن بيلىككە جاقىن پارتيالارمەن وداق ءارى بلوك قۇرۋ – ورەسكەل دۇنيە.

بولاشاقتا دا ونداي قادامعا بارمايمىز.

جسدپ سايلاۋعا اشىق تۇردە قاتىسۋدا ءارى جەڭىسكە ءۇمىتتى!

«Amanat» پارتياسىنىڭ ۇسىنىسىنا كەلەتىن بولساق، بۇل – اشىق پوپۋليزم. بالكىم، بيلىكتىڭ پىكىرىنشە، قانداي دا ءبىر قاعازعا قول قويۋ ارقىلى كەز-كەلگەن ماسەلە شەشىلەتىن شىعار، بىراق ءبىز مۇلدەم باسقاشا ويدامىز. ءبىز ادەمى سوزدەر ەمەس، ءىس-ارەكەتتىڭ ادامدارىمىز.

سايلاۋعا قاتىسۋ ەرەجەلەرى، سونداي-اق ونى بۇزۋعا قاتىستى جاۋاپكەرشىلىك زاڭداردا انىق كورسەتىلگەن. بيلىك پارتياسىنا ايتارىمىز – زاڭدى ۇستانىڭىزدار، سول كەزدە ەشقانداي مەموراندۋمدارعا مۇقتاج بولمايسىزدار.

وسى سەبەپتى ادال ءارى اشىق تۇردە مالىمدەيمىز – جالپىۇلتتىق سوتسيال-دەموكراتيالىق پارتياسى بيلىكپەن اۋىز جالاسپايدى. ءبىز كەز كەلگەن، اسىرەسە، باستى ساياسي قارسىلاسىمىزبەن مەموراندۋم جاساسۋعا قارسىمىز!

ءبىز مەملەكەتتىك ورگانداردىڭ قانداي ىستەرگە بارا الاتىنىن بىلەمىز. وپپوزيتسياداعى جىلدار ءبىزدى بيلىكتىڭ بوس ۋادەلەرىنە سەنبەۋگە ۇيرەتتى. ءبىزدىڭ وسى ءبىر قارسىلىعىمىزدىڭ سوڭى نەگە اپارىپ سوقتىراتىنىن دا تۇسىنەمىز. ءبىز جاڭا ارانداتۋلارعا، لاس ادىستەرگە، ءانونيمدى قارالاۋ مەن مەملەكەتتىك باق-تاردىڭ قۋدالاۋىنا دايىنبىز. بىراق ءبىزدى توقتاتۋ مۇمكىن ەمەس! وپپوزيتسيا ار-وجدانمەن مامىلە جاسامايدى!

جالپىۇلتتىق سوتسيال-دەموكراتيالىق پارتيا ءوزىنىڭ قاعيداتتارىنا ادال بولىپ قالا بەرەدى: ءبىز وليگارحاتقا جانە سىبايلاس جەمقورلىققا قارسىمىز، بىزگە حالىق جانە شىندىق ماڭىزدى!»،-دەدى ول.

ايتا كەتەيىك، بۇعان دەيىن ءماجىلىس پەن ءماسليحاتتار سايلاۋىنا قاتىساتىن التى ساياسي پارتيانىڭ وكىلدەرى ءادىل سايلاۋ وتكىزۋ جونىندە مەموراندۋمعا قول قويعان. مۇنى «امانات» پارتياسىنىڭ تەلەگرام ارناسى جاريالادى.

قۇجاتقا قول قويعان پارتيالار تەك قولدانىستاعى زاڭناما اياسىندا ارەكەت ەتۋگە، سونداي-اق ۇگىت-ناسيحات كەزەڭىندە اشىق باسەكە جۇرگىزۋگە ۋاعدالاسقان.

«ساياسي ۇيىمدار ءبىر-ءبىرىنىڭ جانە وزگە پارتيالاردىڭ اتىنان ۇسىنىلعان كانديداتتاردىڭ ار-نامىسىنا، قادىر-قاسيەتىنە جانە ىسكەرلىك بەدەلىنە نۇقسان كەلتىرەتىن مالىمەتتەردى تاراتپاۋعا، سايلاۋ ۋچاسكەلەرىندە ءتۇرلى تەرىس قىلىقتاردى بولدىرماۋ ءۇشىن ءوزارا جاردەمدەسۋگە، ۇگىت-ناسيحات كەزىندە زاڭنامانى جانە حالىقارالىق ستاندارتتاردى ۇستانۋعا كەلىستى»،-دەلىنگەن حابارلامادا.

مەموراندۋمعا «امانات» پارتياسىنان ەرلان قوشانوۆ، قازاقستان حالىق پارتياسىنان – ەرمۇحامەت ەرتىسباەۆ، «اق جول» دەموكراتيالىق پارتياسىنان – ازات پەرۋاشەۆ، «اۋىل» حالىقتىق-دەموكراتيالىق پاتريوتتىق پارتياسىنان – ءالي بەكتاەۆ، «بايتاق» جاسىلدار پارتياسىنان – ازاماتحان ءامىرتاي، «رەسپۋبليكا» پارتياسىنان – ايداربەك قوجانازاروۆ قول قويدى.

Abai.kz