تۇركيانىڭ نۋرداگى قالاسىنداعى جويقىن جەر سىلكىنىسىنىڭ سالدارىن جويۋعا جۇمىلدىرىلعان قازاقستاندىق قۇتقارۋشىلاردىڭ ەكىنشى ەشەلونى ەلگە ورالدى.

قر تجم قۇتقارۋشىلارى مەن اپاتتار مەديتسيناسى ورتالىعىنىڭ دارىگەرلەرى بار بورت استانا اۋەجايىنا قوندى. ولاردى قازاقستاندىقتار، تۋىستارى، دوستارى مەن ارىپتەستەرى كۇتىپ الدى. تج ءمينيسترى يۋري يلين مەن تۇركيا رەسپۋبليكاسىنىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى ۋفۋك ەكيدجي (Ufuk Ekici) دا قۇتقارۋشىلاردىڭ الدىنان شىعىپ، ولاردىڭ ارقايسىسىنا اتقارعان قيىن جۇمىسى ءۇشىن العىستارىن ءبىلدىردى. سونداي-اق ولاردىڭ ءىس-ارەكەتتەرىن كاسىبي، ەرجۇرەك جانە ناتيجەلى دەپ باعالادى.

مەملەكەت باسشىسىنىڭ تاپسىرماسى بويىنشا 7 اقپاندا قۇتقارۋ بولىمشەلەرىنىڭ كۇشتەرى مەن قۇرالدارى، ونىڭ ىشىندە قازاقستان تجم تەحنيكاسى، اپاتتار مەديتسيناسى ورتالىعىنىڭ دارىگەرلەرى جانە كينولوگيالىق ەسەپتوپتار العاشقىلاردىڭ ءبىرى بولىپ ەكى ەشەلونمەن جولعا شىعىپ، ەڭ كۇردەلى قيراعان وبەكتىلەردە ىزدەستىرۋ-قۇتقارۋ جۇمىستارىن جۇرگىزۋگە كىرىسكەن بولاتىن. قازاقستاندىق قۇتقارۋشىلار توبىن تج ءبىرىنشى ۆيتسە-ءمينيسترى يبراگيم كۇلشىمباەۆ باسقاردى.

ەستەرىڭىزگە سالا كەتەيىك، تۇركيانىڭ ءۇش وڭىرىندە ىزدەستىرۋ-قۇتقارۋ جۇمىستارىن جۇرگىزۋ باستالعاننان بەرى قازاقستان تجم قۇتقارۋشىلارىنىڭ كۇشتەرى 7 ادامدى قۇتقاردى. قازا تاپقان 88 ادامنىڭ، ونىڭ ىشىندە 10 بالانىڭ دەنەسى شىعارىلدى.

Abai.kz