27 قاڭتاردا ازەربايجاننىڭ يران استاناسىنداعى ەلشىلىگىنە جاسالعان قارۋلى شابۋىل كەزىندە قاۋىپسىزدىك قىزمەتىنىڭ باسشىسى مەرت بولىپ، ەكى كۇزەتشى جارالاندى.

يلحام اليەۆ ازەربايجاننىڭ تەھرانداعى ەلشىلىگە جاسالعان شابۋىلدى "ۇيىمداستىرىلعان تەرروريستىك اكت" دەپ اتادى. ونىڭ پىكىرىنشە، تەررورشىنى توقتاتقان كۇزەتشىلەردىڭ ءبىرىنىڭ ەرلىگى عانا ەلشىلىك ديپلوماتتارى مەن ولاردىڭ وتباسىلارىن ولىمنەن اراشالاپ قالدى.

"تەررورشى وسى شابۋىلدان سوڭ يران اقپارات قۇرالدارىنا سۇقبات بەرگەنىنەن-اق ونى يران يستەبليشمەنتىنىڭ وكىلدەرى جىبەرگەنىن اڭعارۋعا بولادى" دەيدى ازەربايجان باسشىسى.

اليەۆ يران بيلىگىنەن شابۋىلدى ءادىل تەكسەرۋدى، ونىڭ بارىسىن باكۋگە حابارلاپ وتىرۋدى تالاپ ەتتى.

ميۋنحەندەگى حالىقارالىق كونفەرەنتسيا كەزىندە جۋرناليستەرمەن تىلدەسكەن پرەزيدەنت يران يستەبليشمەنتىنىڭ وكىلدەرى تەراكت ۇيىمداستىرۋشى رەتىندە جازالانبايىنشا، ەكى ەل اراسىنداعى قارىم-قاتىناس جاقسارۋى مۇمكىن ەمەس دەپ مالىمدەدى.

يران سىرتقى ىستەر مينيسترلىگىنىڭ وكىلى ناسەر كانااني باكۋدى تەھرانداعى ەلشىلىكتە بولعان شابۋىلعا قاتىستى بولجام جاساۋعا اسىقپاۋعا، ءىستى ساياسيلاندىرماۋعا شاقىردى.

27 قاڭتاردا كالاشنيكوۆ اۆتوماتىن اسىنعان ءبىر ەر ازامات ازەربايجاننىڭ تەھرانداعى ەلشىلىگىنە شابۋىلدادى. قاۋىپسىزدىك قىزمەتىنىڭ باسشىسى وققا ۇشتى، ەكى كۇزەتشى جارالاندى. قىلمىسكەر ۇستالدى. تەرگەۋ كەزىندە ول 2022 جىلعى ساۋىردەن بەرى ءىز-ءتۇسسىز جوعالعان ايەلى ەلشىلىك عيماراتىندا دەپ ويلاعانىن ايتقان.

29 قاڭتاردا ازەربايجان تەھرانداعى ديپميسسيا قىزمەتكەرلەرى مەن ولاردىڭ وتباسىلارىن باكۋگە كوشىرىپ الدى. ازەربايجاننىڭ تەھرانداعى ەلشىلىگى ديپلوماتيالىق قىزمەتىن توقتاتتى. قازىر يراندا ازەربايجاننىڭ تەبريزدەگى كونسۋلدىعى عانا جۇمىس ىستەپ تۇر.

Abai.kz