اتامباەۆ مالىمدەمەسىندە پرەزيدەنتتەرمەن كەزدەسكەنىن، باستاپقىدا ونى سادىر جاپاروۆ جانە ۇلتتىق قاۋىپسىزدىك كوميتەتىنىڭ باسشىسى كامچىبەك تاشيەۆپەن كەزدەسۋ دەپ شاقىرعانىن جەتكىزدى.
"مەن دە ەلدىڭ بىرلىگى مەن بەيبىتشىلىگى جاعىندامىن. ول تۋرالى ويىمدى ايتتىم. پرەزيدەنت جاپاروۆتىڭ نيەتىن باعالايمىن. بىراق كەزدەسۋدىڭ سوڭىندا بىلايشا ايتقاندا اعىلشىنشا، ەشكىممەن قوشتاسپاي كەتۋىمە ءماجبۇر بولدىم. ەلگە بىرلىك پەن بەيبىتشىلىكتى نىعايتۋ مەن باكيەۆتى قىرعىزستانعا ورالۋعا رۇقسات بەرۋ، بۇل ەكى بولەك دۇنيە. بۇل ەكەۋىن بىرىكتىرۋ كەرى ناتيجەسىن بەرەدى. وتە كوپ قان توگىلدى. مۇنى ۇمىتۋ مۇمكىن ەمەس. ونى تۋىستارى كەشىرۋى ءتيىس. مەنىڭ بۇل سوزدەرىمدى پرەزيدەنت سادىر جاپاروۆ ەستىدى دەپ ۇمىتتەنەمىن", - دەلىنگەن اتامباەۆتىڭ مالىمدەمەسىندە.
قىرعىزستان باسشىسى سادىر جاپاروۆ Facebook-تەگى پاراقشاسىندا ەلدىڭ بۇرىنعى پرەزيدەنتتەرىمەن كەزدەسۋ وتكىزگەنىن حابارلاعان.
جاپاروۆ جازباسىندا كەزدەسۋ قاشان جانە قاي جەردە وتكەنىن ايتپادى. ول ەلدىڭ بۇرىنعى باسشىلارىنىڭ باسىن قوسۋدى باياعىدان بەرى ويلاپ جۇرگەنىن جانە "باسشىلاردىڭ باسى قوسىلماي، ولاردىڭ جاقتاستارى دا بىرىكپەيتىنىن" اتاپ ءوتتى.
جاپاروۆتىڭ ءباسپاسوز حاتشىسى ەربول سۇلتانباەۆتىڭ ايتۋىنشا، كەزدەسۋگە بۇرىنعى پرەزيدەنتەر اسقار اقاەۆ، قۇرمانبەك باكيەۆ، روزا وتىنباەۆا، المازبەك اتامباەۆ، سوورونباي جەەنبەكوۆ قاتىسقان. سۇلتانباەۆتىڭ ايتۋىنشا، كەزدەسۋ ورنى رەتىندە "بەلگىلى ءبىر سەبەپتەرگە بايلانىستى نەيترال اۋماق تاڭدالعان".
قىرعىزستان تاۋەلسىزدىك العالى بەرى پرەزيدەنت قىزمەتىن اسقار اقاەۆ (1991-2005 جىلدارى), قۇرمانبەك باكيەۆ (2005-2010 جىلدار), روزا وتىنباەۆا (2010-2011 جىلدارى), المازبەك اتامباەۆ (2011-2017 جىلدارى) جانە سوورونباي جەەنبەكوۆ (2017-2020 جىلدارى) اتقارعان.
اقاەۆ – 2005 جىلعى رەۆوليۋتسيادان كەيىن، باكيەۆ 2010 جىلعى رەۆوليۋتسيادان كەيىن ەلدەن قاشتى. جەەنبەكوۆ تە 2020 جىلعى جاپپاي نارازىلىقتان كەيىن قىزمەتىنەن مەرزىمىنەن بۇرىن كەتتى. وتىنباەۆا ۋاقىتشا پرەزيدەنت بولدى. اتامباەۆ بيلىكتەن قۋىلعان جوق، بىراق ول ەكس-پرەزيدەنت مارتەبەسىنەن ايىرىلىپ، 3,5 جىلدان استام ۋاقىت تۇرمەدە بولدى. بىرنەشە كۇن بۇرىن ول مەرزىمىنەن بۇرىن بوساتىلىپ، شەتەلگە ەمدەلۋگە ۇشىپ كەتتى. اقاەۆ پەن باكيەۆ شەتەلدە تۇرىپ جاتىر.
Abai.kz
