پرەمەر-ءمينيستردىڭ ورىنباسارى – ساۋدا جانە ينتەگراتسيا ءمينيسترى سەرىك جۇمانعارين «ءوزىنىڭ 10 پاتەرىنە» قاتىستى سۇراقتارعا جاۋاپ بەردى.

بۇعان دەيىن «باسە» ارناسى ۆيتسە-پرەمەر سەرىك جۇمانعارين «2016 جىلى كوميتەت باسشىسى بولا تۇرا پارانى مۇلىك كۇيىندە الدى» دەگەن اقپارات تاراتقان.

مينيستر مۇنى جالعان اقپارات دەپ، ارنانى سوتقا بەرمەكشى، دەپ جازدى Ulys.media.

«باسە كانالىندا ايتەۋىر جاقسى ءسوز جوق، قاراساڭىز. قازاقستان تۋرالى. مەن قايتالاپ، 10 رەت جاۋاپ بەرمەس ءۇشىن ورىس تىلىندە جاۋاپ بەرەيىن: ينتەرنەت ارنا تاراتقان اقپارات – جالا ءارى بۇرمالاۋ. سونى وقىرمانعا جەتكىزسەڭىزدەر دەيمىن. ەگەر مەنىڭ ءومىربايانىما قاراساڭىز، ونىڭ ەرەكشەلىگىن كورسەڭىز، مەنىڭ مەملەكەتتىك قىزمەتكە 35 جاستان كەيىن كەلگەنىمدى كورەسىز. توقسانىنشى جىلدارى، ەكى مىڭىنشى جىلداردىڭ ورتاسىندا مەن ءوزىم قۇرعان بيزنەس سالاسىندا جۇمىس ىستەدىم. بۇل ۇيلەردى – مەنىڭ وتباسىما تيەسىلى بيزنەس قۇرىلىمدار سالعان»، - دەدى جۇمانعارين.

ۆيتسە-پرەمەردىڭ سوزىنشە، ءۇي سالىنعان ورىندا بۇرىن ەسكى ورمان شارۋاشىلىعى نىسانى بولعان.

«ونى ءبىز ساتىپ الىپ، 2007 جىلى ول جەردە تۇرعىن ءۇي سالا باستادىق. ەستەرىڭىزدە بولسا، 2007 جىل – اسا ءساتتى جىل بولعان جوق. يپوتەكالىق داعدارىس كەزەڭى ەدى. ول جەرگە ۇلكەن قارجى كەتتى. قۇرىلىستى توقتاتۋعا تۋرا كەلدى. كومپانيادا قيىن جاعداي تۋىنداپ، جۇكتەمە كوبەيدى. وعان قوسا 2011 جىلى مەن مەملەكەتتىك قىزمەتتەن كەتۋىمە تۋرا كەلدى. مەن ءبارىن رەتكە كەلتىرۋ ءۇشىن مەملەكەتتىك قىزمەتتەن بەلگىلى ءبىر ۋاقىتقا كەتتىم. كومپانيا قايتا قۇرىلىمداپ، قارىزدارىن جابۋ كەرەك ەدى. 2012 جىلى مەن ينۆەستيتسيالىق كومپانيانى قۇرىپ، ينۆەستيتسيا تارتىپ، بۇل ءۇيدىڭ قۇرىلىسىن اياقتادىق»، - دەيدى ول.

سەرىك جۇمانعاريننىڭ ايتۋىنشا، سول تۇستا ءۇي العىسى كەلەتىن ادامداردىڭ تالاپ-تىلەگى وزگەرىپ كەتكەن. ال سالىنعان ۇيلەردىڭ اۋماعى ۇلكەن بولعان.

«ول كەزدە ۇلكەن ۇيلەر ەشكىمگە كەرەك ەمەس ەدى. 2007-2012 جىلدارى ۇزاق سالىنعان ءۇي بولسا، ەكىنشىدەن سول ۇيلەر ساتىلماي قويدى. كومپانياعا جۇكتەمە كوبەيگەننەن كەيىن، زاڭدى تۇلعالارعا سالىق كوپ بولعاسىن، 2016 جىلى سالىق جاعىنان جەڭىل بولۋى ءۇشىن ءوز اتىمىزعا اۋدارۋعا تۋرا كەلدى. بۇل جەردە ەشقانداي قىلمىس جوق»، - دەدى ول.

«ياعني 10 پاتەر وزىڭىزدىكى مە؟» دەگەن سۇراققا سەرىك جۇمانعارين «ءيا، وزىمىزدىكى، 6-7 جىل بولدى، ولار قازىر جوق» دەپ جاۋاپ بەردى.

«اقتوبە قىزىق قالا. بۇگىنگى تاڭدا ول جاقتا ەڭ ارزان. تاراز ەكەۋىندە. باسقا ايتارىم جوق»، - دەدى ول.

«دەكلاراتسيا وتكىزدىڭىز بە؟» دەگەن سۇراققا جۇمانعارين «مەنىڭ جانە مەنىڭ وتباسىما، بيزنەسىمە، ءار قادامىما بايلانىستى ماسەلەلەر دەكلاراتسيالانعان» دەدى.

«بۇل اقپارات رەسمي كوزدەردەن دەكلاراتسيا وتكىزۋ كەزىندە الىنعان. ول قالايشا باسەدەگى ادامدارعا قالاي جەتكەنىن بىلمەيمىن. مەنىڭ سۋرەتتەرىم دە. سولارعا سۇراق قويۋ كەرەك. قازىر مەنىڭ وتباسىمنىڭ ادۆوكاتتارى سوتقا ارىز تۇسىرگەلى جاتىر»، - دەدى ول.

ۆيتسە-پرەمەر ءسوز سوڭىندا ءوزىنىڭ مەملەكەتتىك قىزمەتتە بولىپ، ايەلىنىڭ بيزنەستە جۇرگەنىنەن ەشقانداي قايشىلىق كورىپ تۇرماعانىن ايتتى. ونىڭ سوزىنشە، ولار بيزنەستى توقسانىنشى جىلدارى باستاعان. زايىبى دەكلاراتسيا وتكىزگەن. ال جۇمانعاريننىڭ ءوزى بەرتىن مەملەكەتتىك قىزمەتكە كەلگەن.

Abai.kz