پرەزيدەنت قاسىم-جومارت توقاەۆ الماتى قالاسىنىڭ اكىمى ەربولات دوساەۆتى قابىلدادى، دەپ حابارلايدى اقوردا.

مەملەكەت باسشىسىنا الماتى قالاسىنىڭ الەۋمەتتىك-ەكونوميكالىق جاعدايى تۋرالى ەسەپ بەرىلدى. بيىل قاڭتار ايىندا قالانىڭ قىسقا مەرزىمدى ەكونوميكالىق ينديكاتورى ينۆەستيتسيالىق جانە ىسكەرلىك بەلسەندىلىكتىڭ ءوسۋى ەسەبىنەن 136,7 پايىزعا دەيىن ارتتى. نەگىزگى كاپيتالعا قۇيىلعان ينۆەستيتسيا كولەمى 21,9 پايىزعا ۇلعايدى. ەكونوميكانىڭ دامۋ قارقىنىن ساۋدا، كولىك جانە وڭدەۋشى ونەركاسىپ سالالارىنداعى ءوسىم قامتاماسىز ەتتى.

ەربولات دوساەۆ قاسىم-جومارت توقاەۆقا قالانىڭ 2040 جىلعا دەيىنگى جاڭا باس جوسپارىن ازىرلەۋدىڭ نەگىزگى تاسىلدەرى جونىندە باياندادى. ونى دايىنداۋ بارىسىندا مەملەكەت باسشىسىنىڭ 2022 جىلعى 16 قاراشادا الماتى جۇرتشىلىعىمەن كەزدەسۋىندە ايتقان تاپسىرمالارى ەسكەرىلگەن.

پرەزيدەنت قالانىڭ سەيسميكالىق قاۋىپسىزدىگىن قامتاماسىز ەتۋ بويىنشا ۇسىنىلعان شارالار مەن بيىلعى ەكىنشى جارتىجىلدىقتا سەيسمواۋديت جۇرگىزۋ جوسپارىن ماقۇلدادى. بۇل شاھارداعى نىسانداردىڭ قۇجاتتارىن جاڭارتۋعا مۇمكىندىك بەرەدى.

مەملەكەت باسشىسىنا قالا ىشىندە «جاسىل دالىزدەر» جاساۋ ءۇشىن دۇنيەجۇزىلىك بانكپەن بىرلەسە ازىرلەنىپ جاتقان ءىس-ارەكەت جوسپارى بويىنشا ارالىق ەسەپ بەرىلدى. بۇل باستاما اياسىندا جاسىل جەلەگى مول اۋماقتاردىڭ اۋدانىن ۇلعايتۋ، سونىڭ ىشىندە وزەن ارنالارى مەن كانالدار بويىن كوگالداندىرۋ جوسپارلانىپ وتىر.

پرەزيدەنتكە الماتىنىڭ يندۋستريالىق ايماعىندا اۆتوموبيل كلاستەرىن قۇرۋ بارىسى باياندالدى.

قاسىم-جومارت توقاەۆ ناقتى تابىستىڭ ارتۋىن قامتاماسىز ەتۋگە جانە قالاداعى ەكولوگيالىق احۋالدى جاقسارتۋعا باعىتتالعان شارالاردى كۇشەيتۋ جونىندە تاپسىرما بەردى.

Abai.kz