جامبىل وبلىسىنىڭ پروكۋراتۋراسى «كوسپاەۆ» ۇيىمداسقان قىلمىستىق توبى مۇشەلەرىن مەملەكەتتىك شەكارادان وتكىزگەن تۇرعىندى ۇستادى، دەپ مالىمدەدى باس پروكۋراتۋرانىڭ رەسمي سايتى.

ۇيىمداسقان قىلمىستىق توپ مۇشەلەرى: شالين، يماشەۆ جانە قوسپاەۆقا قارجىلىق مونيتورينگ اگەنتتىگى قىلمىستىق كودەكستىڭ 249 (رەيدەرلىك) جانە 262-باپتارىمەن (ۇيىمداسقان قىلمىستىق توپ قۇرۋ جانە قاتىسۋ) حالىقارالىق ىزدەۋ جاريالاعان.

بەلگىلى بولعانىنداي، توپ مۇشەلەرى جامبىل وبلىسىنىڭ اۋماعىندا ورنالاسقان مەملەكەتتىك شەكارا ارقىلى ەلىمىزدەن شىعىپ كەتكەن. وسى رەتتە، 2022 جىلعى 10 قاراشادا قورداي اۋداندىق پوليتسيا ءبولىمى قك-ءنىڭ 394-بابى 2-بولىگىمەن (زاڭسىز كوشى-قوندى ۇيىمداستىرۋ) قىلمىستىق ءىس تىركەگەن. 2022 جىلعى 11 قاراشادا قورداي اۋدانىنىڭ پروكۋرورى بىرلىك ءىزباساروۆتىڭ قاۋلىسىمەن پوليتسيا جانە شەكارا باسقارماسىنىڭ تاجىريبەلى قىزمەتكەرلەرىنەن مەكەمەارالىق توپ قۇرىلادى.

پروكۋراتۋرانىڭ ۇيلەستىرۋ جۇمىستارى ناتيجەسىندە، ولاردى 2022 جىلعى 6 تامىزدا سورتوبە اۋىلىنىڭ ماڭىنداعى وتكەل ارقىلى مەملەكەتتىك شەكارادان وتكىزۋدى ۇيىمداستىرعان جەرگىلىكتى تۇرعىن انىقتالىپ، ۇستالدى.

كۇدىكتى كىناسىن تولىق مويىندادى. سوتقا دەيىنگى تەرگەپ-تەكسەرۋ جۇمىستارى ءجۇرىپ جاتىر جانە ول پروكۋراتۋرانىڭ باقىلاۋىندا.

Abai.kz