بايقوڭىردا 4 مىڭ تۇرعىن تەگىن مەديتسينالىق قىزمەت الا الماي ءجۇر. بۇل تۋرالى سەنات دەپۋتاتى اقمارال ءالنازاروۆا ايتتى.

اقمارال ءالنازاروۆا دەپۋتاتتىق ساۋالىن پرەمەر-پينيستر ءاليحان سمايىلوۆقا جولدادى.

«بايقوڭىردا 4 مىڭعا جۋىق قازاقستان ازاماتى رەسەي زاڭناماسىنىڭ ەرەجەلەرى بويىنشا، ونىڭ ىشىندە 1996 جىلعى ۇكىمەتارالىق كەلىسىمگە سايكەس زەينەتاقى الادى. قازىر بۇل ادامدار مىندەتتى الەۋمەتتىك مەديتسينالىق ساقتاندىرۋ اياسىندا تەگىن مەديتسينالىق كومەك الا الماي ءجۇر. سەبەبى، ولار تۋرالى دەرەكتەر ەلىمىزدىڭ ەڭبەك مينيسترلىگىنىڭ اقپاراتتىق بازاسىندا جوق»، - دەدى اقمارال ءالنازاروۆا سەناتتىڭ جالپى وتىرىسىندا.

سەناتوردىڭ ايۋتىنشا، بىلتىر 2 مىڭنان استام ناۋقاس قاجەتتى كومەك الا الماعان.

- 2022 جىلى 2 مىڭنان اسا ناۋقاس كونسۋلتاتسيالىق-دياگنوستيكالىق كومەك، 600-گە جۋىق ناۋقاس جوسپارلى ستاتسيونارلىق كومەك، ونىڭ ىشىندە كوروناروگرافيالىق جانە وفتالموحيرۋرگيا كومەگىنە قول جەتكىزە المادى، - دەدى سەناتور.

2016 جىلدان باستاپ بايقوڭىردا قازاقستاندىق اۋرۋحانا جۇمىس ىستەي باستاعان. الايدا بۇل اۋرۋحانا تەگىن مەديتسينالىق قىزمەتتەردى قازاقستاننىڭ ساقتاندىرىلعان ازاماتتارىنا عانا كورسەتەدى.

«وسىلايشا، زەينەتكەرلەر تەگىن مەديتسينالىق كومەك الۋ قۇقىعىنان ايىرىلىپ وتىر. قارت ادامدارعا قاتىستى مەملەكەتتىك ساياساتتىڭ نەگىزگى ەرەجەلەرىن جانە اتالعان پروبلەمانىڭ ەرەكشە الەۋمەتتىك ماڭىزدىلىعىن ەسكەرىپ، وسى ازاماتتاردى ەلىمىزدىڭ اقپارات جۇيەسىنە ەنگىزۋ، ءتيىستى قارجىلاندىرۋ ماسەلەسىن شەشۋدى جانە مەملەكەتتىك جارنا تولەيتىن ادامداردىڭ جەڭىلدەتىلگەن ساناتىندا بولۋىن قامتاماسىز ەتۋىن قاراستىرۋدى سۇرايمىز»، - دەدى دەپۋتات.

Abai.kz