قازاقستان يندۋستريا جانە ينفراقۇرىلىمدىق دامۋ مينيسترلىگى استانا قالاسىنداعى LRT قۇرىلىسىن قايتا قوزعاۋ ءۇشىن 50 ميلليارد تەڭگە بولىنەتىنىن حابارلادى. مينيستر مارات قاراباەۆتىڭ سوزىنشە، بۇل سوما استانا اكىمدىگىنە بيىل ساۋىردە بەرىلەدى.

ول ۇكىمەت وتىرىسىنان كەيىن جۋرناليستەردىڭ سۇراقتارىنا جاۋاپ بەرىپ تۇرعاندا: "LRT قۇرىلىسى اياقتالادى. بيىل كەرەك قارجى قاراستىرىلدى. قۇرىلىستى استانا اكىمدىگىمەن بىرگە تالقىلادىق. جۇمىس اۋەجاي جاقتان باستالادى. اقشانىڭ ءبىر بولىگى ۆاگون ساتىپ الۋ ءۇشىن اۆانس ەسەبىندە بەرىلەدى" دەدى. الايدا ول 10 جىل بۇرىن باستالعان قۇرىلىس قاشان اياقتالاتىنىن ايتقان جوق.

مەملەكەت LRT جوباسىن اياقتاۋ ءۇشىن بيۋدجەتتەن ونداعان ميلليارد تەڭگە بولەتىنىن جىل سايىن ايتىپ كەلەدى. 2016 جىلى استانا اكىمدىگى جوبانى سوڭىنا جەتكىزۋ ءۇشىن تاعى دا 1,5 ميلليارد دوللار كەرەك دەگەن بولاتىن. ءتۇرلى اقپاراتقا قاراعاندا، 2015 جىلدان بەرى 156 ميلليارد تەڭگە بولىنگەن.

"استانا LRT" كومپانياسىنىڭ قارجىسى مەن شارۋاشىلىعىن تەكسەرۋ قورىتىندىسىن جاريالاعان رەسپۋبليكالىق بيۋدجەتتىڭ جۇمسالۋىن باقىلاۋ كوميتەتى جوبا ءوز-ءوزىن اقتامايتىنىنا نازار اۋدارعان.

بىلتىر قىركۇيەك ايىندا استانا اكىمدىگى LRT قۇرىلىسىن قالاي بولعاندا دا اياقتاۋعا تۋرا كەلەتىنىن مالىمدەگەن. بيىل قازاقستان پرەزيدەنتى قاسىم-جومارت توقاەۆ استانانى دامىتۋ جونىندەگى كەڭەستە "باسقا تاڭداۋ جوق. بۇل جوبانى اياقتاۋ كەرەك. توقتاتساق، شىعىنىمىز ودان دا كوپ بولادى" دەگەن.

2022 جىلعى جەلتوقساندا بيلىك LRT قۇرىلىسى قارجى جەتكلىكتى بولسا، ەكى-ءۇش جىلدا اياقتالاتىنىن مالىمدەگەن.

قازاقستان LRT قۇرىلىسىن قىتايدان قارىز الىپ باستاعان. كەيىن توقتاپ قالعان قۇرىلىستى جۇرتشىلىق "جەمقورلىققا قويىلعان ەسكەرتكىش" دەپ باعالاعان.

2021 جىلى استانا سوتى ارادا بىرنەشە اي وتكەن سوڭ، "LRT قۇرىلىسىنان اقشا جىمقىردى" دەگەن ايىپپەن سوتتالعان "استانا LRT" كومپانياسىنىڭ قىزمەتكەرلەرى مەن شەنەۋنىكتەردى اقتاعان.

استانا قالاسى اكىمىنىڭ بۇرىنعى ورىنباسارى قانات سۇلتانبەكوۆ پەن "استانا LRT-نىڭ" بۇرىنعى جەتەكشىسى تالعات ارداندى جەمقورلىقپەن كۇرەس قىزمەتى "استانا LRT" جشس قارجىسىن جىمقىرۋدى ۇيىمداستىرۋشىلار" دەپ اتاعان. ەكەۋى دە شەتەلگە قاشىپ كەتىپ، ولارعا حالىقارالىق ىزدەۋ جاريالانعان.

Abai.kz