بۇگىننەن باستاپ قازاقستاندىقتار قوعامدىق ورىندا ايتىلعان بالاعات ءسوز ءۇشىن ءتورت ەسە ارتىعىمەن ايىپپۇل تولەيدى.

قوعامدىق ورىندا بالاعات ءسوز ايتۋ اكىمشىلىك قۇقىقبۇزۋشىلىقتار كودەكسىندە «ۇساق بۇزاقىلىق» ساناتىنا جاتادى.

سونداي-اق، ۇساق بۇزاقىلىق قاتارىنا جەكە تۇلعالاردى قورلاۋ جانە ولارعا قىسىم كورسەتۋ، عيماراتتارعا، قۇرىلىستارعا، تۇرعىن ءۇي-جايلارعا، ورتاق پايدالانۋ ورىندارىنا، كولىكتەگى جانە قوعامدىق ورىندارداعى مۇلىككە نۇقسان كەلتىرۋ، اينالاعا قۇرمەتسىزدىك بىلدىرەتىن، قوعامدىق ءتارتىپ پەن جەكە تۇلعالاردىڭ تىنىشتىعىن بۇزاتىن جايتتار جاتادى.

سونىمەن ىشكى ىستەر مينيسترلىگىنىڭ مالىمەتىنشە، بۇعان دەيىن سوت ۇساق بۇزاقىلىق جاساعانى ءۇشىن 5 اەك (17 250 تەڭگە) مولشەرىندە ايىپپۇل سالاتىن نەمەسە 15 تاۋلىككە دەيىن قاماۋعا الاتىن ەدى. ال بۇگىننەن باستاپ ايىپپۇل 20 اەك (69 000 تەڭگە) قۇرايدى، قاماۋعا الۋ 5-تەن 30 تاۋلىككە دەيىن ۇزارادى.

ەسكە سالساق، بيىل 3 قاڭتاردا مەملەكەت باسشىسى قاسىم-جومارت توقاەۆ «قر قىلمىستىق جانە قىلمىستىق ءىس جۇرگىزۋ كودەكستەرىنە ەكولوگيالىق قۇقىقبۇزۋشىلىقتار مەن ۆانداليزم كورىنىستەرى ءۇشىن جاۋاپكەرشىلىكتى كۇشەيتۋ ماسەلەلەرى بويىنشا تولىقتىرۋلار ەنگىزۋ تۋرالى» جانە «قر اكىمشىلىك قۇقىق بۇزۋشىلىق تۋرالى كودەكسىنە ەكولوگيالىق قۇقىقبۇزۋشىلىقتار مەن ۆانداليزم كورىنىستەرى ءۇشىن جاۋاپكەرشىلىكتى كۇشەيتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭعا قول قويدى.

Abai.kz