تۇركيا پرەزيدەنتى رەجەپ تايىپ ەردوعان ەلدەگى جەر سىلكىنىسىنەن قازا تاپقاندار سانى 46 104-كە جەتكەنىن ايتتى، - دەپ حابارلايدى Tengrinews.kz تىلشىسى TRT Haber تەلەارناسىنا سىلتەمە جاساپ.

تۇركيا باسشىسىنىڭ ايتۋىنشا، اقپاندا ەلدى ءدۇر سىلكىندىرگەن ەكى جويقىن جەر سىلكىنىسى 62 اۋداندا، 10 190 اۋىلدا جانە 11 پروۆينتسيادا بولعان. بۇگىنگى تاڭدا قازا تاپقانداردىڭ جالپى سانى 46 104 ادامعا جەتكەن.

ەردوعان قازىر جەر سىلكىنىسى بولعان ايماقتاردان 3 ميلليون 320 مىڭ ادام ەۆاكۋاتسيالانىپ، باسقا پروۆينتسيالارعا كەتكەنىن ايتتى. بۇل رەتتە 800 مىڭ ادام بارعان جەرلەرىنەن باسپانا تاپقان.

ونىڭ ايتۋىنشا، 1,5 ميلليوننان استام ادام شاتىرلاردا، 53 مىڭ ادام كونتەينەرلەردە، 123 مىڭ ادام مەملەكەتتىك مەكەمەلەردە، اسىرەسە رەسپۋبليكالىق ءبىلىم بەرۋ مەكەمەلەرىندە، 160 مىڭ ادام جاستار جانە سپورت مينيسترلىگىنىڭ جاتاقحانالارىندا جانە 137 مىڭ ادام قوناقۇيلەردە تۇرىپ جاتىر.

سونداي-اق ەردوعان اپات بولعان ايماقتاردا الداعى ۋاقىتتا قايتا سالىنۋى جوسپارلانعان ۇيلەر قاۋىپسىزدىكتى ەسكەرە وتىرىپ سالىناتىنىن ايتتى. مىسالى، ولارداعى ۇيلەر ءۇش قاباتتان جوعارى بولمايدى.

ازىرگە تۇرىك بيلىگى ەلەكتر، سۋ، كارىز، جول، الەۋمەتتىك نىساندارى بار جىلجىمالى كونتەينەرلىك قالالاردى سالىپ جاتىر. تۇرعىندار وسى جايلى جاعدايدا تۇرىپ، تۇراقتى تۇراتىن تۇرعىن ۇيلەرىن كۇتەدى.

ء"بىزدىڭ ماقساتىمىز - 2 ايدىڭ ىشىندە 100 000 كونتەينەر ورناتىپ، جەر سىلكىنىسىنەن زارداپ شەككەندەرگە جاقسى جاعداي جاساۋ. قاجەت بولسا، كونتەينەرلەر سانىن كوبەيتەمىز", - دەدى ەردوعان.

Abai.kz