2024 جىلى مەكتەپ پاندەرى 100 پايىز ەلەكتروندىق فورماتقا كوشىرىلەدى. بۇل تۋرالى ۇكىمەت وتىرىسىندا وقۋ-اعارتۋ ءمينيسترى عاني بەيسەمباەۆ حابارلادى.

«سونىمەن قاتار ۆيرتۋالدى زەرتحانالار مەن گەيميفيكاتسيا ەلەمەنتتەرى تسيفرلىق كونتەنتكە ەنگىزىلۋدە. ەلەكتروندىق وقۋلىقتار ازىرلەۋ جۇمىسىنا ەلىمىزدەگى 11-دەن اسا وتاندىق باسپالار اتسالىستى. پاندەردى ەلەكتروندىق وقۋلىقتارمەن 100 پايىز قامتۋ 2024 جىلعا جوسپارلانعان. پەداگوگتەر ءۇشىن ەلەكتروندىق وقۋلىقتاردى ءتيىمدى پايدالانۋ ادىستەمەلەرى ازىرلەنىپ، وقىتۋ جۇمىستارى باستالدى»، - دەدى ول.

مينيستر ەلەكتروندىق وقۋلىقتارمەن قاتار مەكتەپتەردە قوسىمشا وقۋ ماتەريالى رەتىندە مۋلتيمەديالىق كونتەنتى بار تسيفرلىق ءبىلىم بەرۋ رەسۋرستارى بەلسەندى قولدانىلاتىندىعىن ايتتى.

«قازىرگى كۇنى 50 مىڭنان اسا تسيفرلىق ءبىلىم بەرۋ رەسۋرسى جاسالدى. 2023 جىلدىڭ باسىنان باستاپ تسيفرلىق ءبىلىم بەرۋ رەسۋرستارىنا 6,7 مىڭ مەكتەپ قوسىلدى. بۇل رەسۋرستاردى بۇگىندە كۇن سايىن 3 ميلليونعا دەيىن وقۋشى مەن مۇعالىم قولدانىپ كەلەدى. تسيفرلىق ءبىلىم رەسۋرستارىندا بارلىق سىنىپتاردى قامتيتىن 50 مىڭنان اسا بەينەساباق جاريالانعان»، - دەدى مينيستر.

Abai.kz