ءماجىلىس دەپۋتاتتىعىنا ۇمىتكەر، قوعام بەلسەندىسى ارمان شوراەۆ قازاقستان حالىقتىق پارتياسىنان كانديداتتىڭ ار-نامىسىنا، قادىر-قاسيەتىنە جانە ىسكەرلىك بەدەلىنە نۇقسان كەلتىرەتىن مالىمەتتەردى تاراتقانى ءۇشىن كىنالى دەپ تانىلدى. بۇل تۋرالى ءوزىنىڭ الەۋمەتتىك پاراقشاسىندا جازدى.

«بۇگىن استانا قالاسىنىڭ اكىمشىلىك قۇقىق بۇزۋشىلىق جونىندەگى مامانداندىرىلعان اۋدانارالىق سوتى مەنى قر اقبتك 104-بابى بويىنشا قازاقستان حالىقتىق پارتياسىنان كانديداتتىڭ ار-نامىسىنا، قادىر-قاسيەتىنە جانە ىسكەرلىك بەدەلىنە نۇقسان كەلتىرەتىن مالىمەتتەردى تاراتقانى ءۇشىن كىنالى دەپ تانىدى.

قاۋلى زاڭدى كۇشىنە ەنگەن جوق. ونىڭ كۇشىنە ەنۋى ءۇشىن 10 كۇن قاجەت، ياعني 2023 جىلدىڭ 24 ناۋرىزىنا دەيىن.

ارينە، شىعارىلعان سوت اكتىسىمەن كەلىسپەيمىن، شاعىمدانامىن. وكىنىشتىسى، مۇنداي شاعىمدى قاراۋ سايلاۋ ءوتىپ جاتقان 2023 جىلدىڭ 24 ناۋرىزىنان كەيىنگە قالادى.

"قر-داعى سايلاۋ تۋرالى" قر كونستيتۋتسيالىق زاڭىنىڭ 4-3-تارماعىنا سايكەس كانديداتتى تىركەۋ تۋرالى شەشىمنىڭ كۇشىن جويۋعا نەمەسە داۋىس بەرۋ كۇنىنە ەكى كۇن قالعاندا بۇرىن تىركەۋدەن شىعارىلعان كانديداتتى قالپىنا كەلتىرۋگە جول بەرىلمەيدى.

قر كونستيتۋتسياسىنىڭ 77-بابىنا سايكەس، ونىڭ كىناسى زاڭدى كۇشىنە ەنگەن سوت اكتىسى رەتىندە تانىلعانعا دەيىن ادام كىناسىز بولىپ سانالادى.

دەمەك، 2023 جىلدىڭ 19 ناۋرىزىنا دەيىن سوت اكتىسى زاڭدى كۇشىنە ەنبەيدى، سوندىقتان اۋداندىق سايلاۋ كوميسسياسى اپەللياتسيا قارالعانعا دەيىن تىركەۋ تۋرالى شەشىمنىڭ كۇشىن جويۋعا قۇقىسى جوق.

سوڭعى كۇندەرى استانا قالاسى "ەسىل" اۋدانى اكىمى اپپاراتىنىڭ باسشىسى جۇنىسبەكوۆ باقىتجان تاراپىنان قىزمەتتەن كەتۋدى تالاپ ەتكەن № 2 يىۇ توراعاسى جولماعامبەتوۆا ايسارا بۇگىن كوميسسيانىڭ بەس مۇشەسىنىڭ ۇشەۋى باسقا تۇلعالارمەن اۋىستىرىلعاننان كەيىن توراعا قىزمەتىنەن كەتۋگە جانە قاراپايىم مۇشە بولۋعا ءماجبۇر بولدى.

ەندى № 2 اۋداندىق سايلاۋ كوميسسياسىنىڭ جاڭا توراعاسى سوتتىڭ زاڭدى كۇشىنە ەنبەگەن قاۋلىسى بويىنشا مەنى تىركەۋدەن جويۋعا بارا ما، جوق پا، سونى كۇتۋ عانا قالادى.

كونستيتۋتسيا مەن سايلاۋ تۋرالى كونستيتۋتسيالىق زاڭنىڭ بۇزىلۋىنا ورتالىق سايلاۋ كوميسسياسى جانە اۋداندىق سايلاۋ كوميسسياسى  جول بەرە مە، بەرمەي مە، ونى ءبىز الداعى كۇندەرى كورەمىز.

مەنى سايلاۋعا تۇسىرمەۋ ءۇشىن جاڭا قازاقستان تاعى دا قانداي زاڭبۇزۋشىلىقتارعا باراتىنىن كورەيىك…»،-دەپ جازدى ول.

ايتا كەتەيىك، سايلاۋالدى ناۋقانى باستالعاننان كەيىن، قازاقستان حالىق پارتياسىنىڭ مۇشەسى نۇريا بالتابايقىزى ارمان شوراەۆتىڭ ۇستىنەن ارىز جازىپ، سوتقا شاعىمداندى. ارىزعا شوراەۆتىڭ 2023 جىلعى 20 اقپاندا Facebook الەۋمەتتىك جەلىسىندە "قازاقستان حالىق پارتياسىنىڭ توراعاسى ەرمۇحامەت ەرتىسباەۆتىڭ سۋرەتىن جاريالاپ" ونى "ساتقىن" دەپ اتاعانى، وسى جازبا پارتيا مۇشەسى رەتىندە ونىڭ "ار-نامىسىنا تيگەنى" سەبەپ بولعان كورىنەدى.

ارمان شوراەۆ قازاقستان حالىق پارتياسىنىڭ مۇشەسى ەرمۇحامەت ەرتىسباەۆ پەن رەسەي ءجۋرناليسى ۆلاديمير سولوۆەۆتىڭ ۆيدەوسۇحباتىنان كەيىن «بۇل ساتقىندارعا داۋىس بەرمەڭدەر!» دەپ جازعان بولاتىن.

قازاق قوعامى شوراەۆتىڭ قامالۋىنا نارازى. مۇنى ماجىلىسكە بارا جاتقان ۇمىتكەردىڭ اياعىنان شالۋ ارەكەتى دەپ باعالاۋدا.

Abai.kz