مەملەكەت باسشىسى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قىلمىستىق سوت ءىسىن جۇرگىزۋ سالاسىنداعى ادام قۇقىقتارى، جازانى ورىنداۋ، سونداي-اق ازاپتاۋ مەن باسقا دا قاتىگەز، ادامگەرشىلىككە جاتپايتىن نەمەسە قادىر-قاسيەتتى قورلايتىن قارىم-قاتىناس تۇرلەرىنىڭ الدىن الۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسىنىڭ زاڭىنا قول قويدى، دەپ حابارلايدى اقوردا.

بۇل زاڭ – ەلىمىزدە جۇرگىزىلىپ جاتقان ساياسي جانە قۇقىقتىق رەفورمالار اياسىندا قازاقستاننىڭ ازاپتاۋ مەن قورلاۋدىڭ باسقا دا تۇرلەرىن جويۋعا، وسى ماسەلە بويىنشا حالىقارالىق نورمالاردى ۇلتتىق زاڭناماعا ەنگىزۋگە، سونداي-اق سوتتالعانداردىڭ قۇقىعىن كەڭەيتىپ، تۇرمەدەگى تەرىس سۋبمادەنيەتتىڭ قالىپتاسۋىنا جول بەرمەۋگە باعىتتالعان جۇيەلى قادامداردىڭ جالعاسى.

اتاپ ايتقاندا، قۇجاتتا مىناداي نورمالار قاراستىرىلعان:

قاتىگەز نەمەسە ادامنىڭ قادىر-قاسيەتىن قورلايتىن قارىم-قاتىناس ءۇشىن جاۋاپكەرشىلىك قاراستىرىلادى;

ازاپتاۋ ءۇشىن قىلمىستىق جاۋاپكەرشىلىككە تارتۋ شارالارى قاتاڭداتىلادى;

زاڭسىز ارەكەتتەردىڭ الدىن الۋ ءۇشىن تەرگەۋ امالدارى كەزىندە اۋديو جانە بەينە تاسپالاۋ جۇيەسىن قولدانۋ مۇمكىندىكتەرى كەڭەيتىلەدى.

سونىمەن قاتار، زاڭ سوتتالعان ادامدارعا بىرقاتار قوسىمشا قۇقىق بەرەدى:

اۋىر سىرقاتقا شالدىققان جاعدايدا ولارعا جازانى وتەۋ مەرزىمىن كەيىنگى قالدىرۋ قۇقىعى بەرىلەدى، ياعني سوتتالعان ادامعا مەديتسينالىق مەكەمەدە شۇعىل ەم الۋعا مۇمكىندىك تۋادى;

سوتتالعان ادامدى اۋىر دەرتكە شالدىعۋىنا بايلانىستى جازاسىن وتەۋدەن بوساتۋ تۋرالى سوت شەشىمى دەرەۋ ورىندالادى (بۇرىن سوتتالعاندار سوتتىڭ شەشىمى زاڭدىق كۇشىنە ەنگەننەن كەيىن عانا بوساتىلاتىن);

سوتتالعان ايەلدەر مەن ولاردىڭ بالالارى اراسىنداعى الەۋمەتتىك بايلانىستى ساقتاۋ ءۇشىن ولارعا ءوز بالالارىن كولونيادا قالدىرۋعا رۇقسات ەتۋ مەرزىمى 3 جىلدان 4 جىلعا ۇزارتىلدى;

بۇرىن سوتتالعان ادامداردىڭ ءبىرىنشى رەت ءىستى بولعان ازاماتتارعا تەرىس ىقپال ەتۋىنە جول بەرمەۋ ءۇشىن سوتتالعانداردى قىلمىستىق-اتقارۋ جۇيەسىندەگى مەكەمەلەرگە ءبولۋ تاسىلدەرى وزگەرەدى. ەندى ءبىرىنشى رەت سوتتالعاندار باس بوستاندىعىنان ايىرۋ جازاسىن بۇرىن سوتتالعانداردان بولەك جەردە وتەيدى. بۇل زاڭعا باعىنۋشىلىق مىنەز-قۇلىق قالىپتاستىرۋعا مۇمكىندىك بەرەدى.

جالپى، زاڭنامالىق اكتىلەرگە ەنگىزىلگەن وزگەرىستەر ادام قۇقىقتارىن ساقتاۋعا بەرىلەتىن كەپىلدىكتەردى ارتتىرادى. سونىمەن قاتار، قاۋىپسىزدىك شارالارىن كۇشەيتۋ، ولاردىڭ تۇزەلۋىنە جانە قوعامعا بەيىمدەلۋىنە مۇمكىندىك جاساۋ ارقىلى سوتتالعان ادامداردىڭ تۇرمەدەگى جاعدايىن جاقسارتۋدى كوزدەيدى.

زاڭنىڭ ءماتىنى باسپاسوزدە جاريالانادى.

Abai.kz