قازاقستان مۇسىلماندارى ءدىني باسقارماسىنىڭ توراعاسى، باس ءمۇفتي ناۋرىزباي قاجى تاعانۇلى حالىقتى رامازان ايىنداعى قايىرىمدى ىستەرگە بەلسەندى اتسالىسۋعا شاقىردى.

«ءبىز ورتالىق ازيا ەلدەرىنىڭ مۇفتيلەرىمەن، ونداعى ءپاتۋا سالاسىنا جاۋاپتى عالىمدارمەن اقىلداسا كەلە جانە عىلىمي زەرتتەۋلەر ناتيجەسىن ەسكەرىپ، ورتاق شەشىم قابىلدادىق. اللا قالاسا، بيىل رامازان ايى 23 ناۋرىزدا باستالادى. ال ءساۋىر ايىنىڭ 17-نەن 18-نە قاراعان ءتۇن – قاسيەتتى قادىر ءتۇنى. 21 ءساۋىر – ورازا ايت مەرەكەسى. بيىلعى ءپىتىر ساداقاسى جان باسىنا 535 تەڭگە بولىپ بەكىتىلدى. ءپىتىر ساداقاسى مولشەرى ەلىمىز بويىنشا ەكى كەلى ۇننىڭ ورتاق باعاسى نەگىزىندە بەلگىلەندى. ءپىتىر ساداقاسىن قۇرما، مەيىز باعاسىمەن بەرۋگە بولادى»، - دەدى باس ءمۇفتي ورتالىق كوممۋنيكاتسيالار قىزمەتىندە وتكەن بريفينگىدە.

سونداي-اق ناۋرىزباي قاجى تاعانۇلى شاريعات بويىنشا باليعاتقا تولعان، اقىل-ەسى دۇرىس ءاربىر مۇسىلمانعا رامازان ايىندا ورازا ۇستاۋ – پارىز ەكەنىن ەسكە سالدى. الايدا، جولاۋشىلارعا، سىرقاتتانعان نەمەسە دەنساۋلىعى جارامايتىن ادامدار دەرتىنىڭ اسقىنۋىنان قاۋىپتەنسە ورازا تۇتۋدى كەيىنگە قالدىرۋعا شاريعاتىمىز رۇقسات بەرەدى. سونداي-اق جۇكتى نەمەسە ومىراۋدا بالاسى بار ايەلدەرگە دە ۋاقىتشا ورازا ۇستاماۋعا بولادى.

ونىڭ ايتۋىنا قاراعاندا، رامازان ايىندا مۇمكىندىگىنشە مۇقتاج جاندارعا كومەكتەسىپ، ولاردىڭ العىسى مەن باتاسىن الۋعا اسىققان ابزال. «زەكەت جانە قايىرىمدىلىق» قورى قاسيەتتى رامازان ايىندا بىرنەشە قايىرىمدىلىق جوبالار وتكىزبەكشى. اتاپ ايتقاندا، «شاراپاتتى رامازان»، «رامازان قورجىنى»، «رامازاننان تابەرىك» سىندى اۋقىمدى رەسپۋبليكالىق قايىرىمدىلىق ءىس-شارالاردى ۇيىمداستىرادى.

«بارشا حالىقتى ساۋاپتى ىستەرىمىزگە ۇلەس قوسىپ، جاقسىلىقتىڭ باسى-قاسىنان تابىلىپ، بەلسەندى تۇردە اتسالىسۋعا شاقىرامىن. وسى رەتتە كاسىپكەر ازاماتتاردى، ساۋدا ورتالىقتارىنىڭ باسشىلارىن قاسيەتتى ايدىڭ قۇرمەتى ءۇشىن حالقىمىزدىڭ تۇرمىس جاعدايىن ەسكەرىپ، الەۋمەتتىك ماڭىزى بار تاۋارلار مەن ازىق-تۇلىك باعاسىن مۇمكىندىگىنشە 10 پايىزعا دەيىن تومەندەتىپ، جەڭىلدىك جاساۋعا ۇندەيمىن. جاقسى امالدارىڭىز وزدەرىڭىزگە ەسەلەپ جاقسىلىق بولىپ قايتاتىنىندا كۇمان جوق»، - دەدى باس ءمۇفتي.

Abai.kz