وسى اپتادا شي ءجينپيڭنىڭ رەسەيگە ساپارى، رەسەي-قىتاي قارىم-قاتىناسى، جالپى قىتاي تۋرالى كوپ ايتىلدى. توراعا ءشيدىڭ ماسكەۋگە ساپارىنا باعا بەرۋ مەن اقپاراتتىق شۋ ارالاسىپ كەتتى.

سوندىقتان قىتاي كوشباسشىسى مەن رەسەي پرەزيدەنتى اراسىنداعى كەزدەسۋدىڭ ناتيجەلەرىنە تاعى دا بايسالدى ءارى سىني تۇرعىدان باعا بەرگەن ءجون.

ءار مينۋت سايىن «شي جينپيڭ اناۋمەن قول الىستى، مىناعان سويلەدى،  پۋتين بىردەڭە دەدى، وعان قىتاي حالىق رەسپۋبليكاسىنىڭ توراعاسى ەكى رەت باسىن يزەدى» دەگەن جاڭالىقتار تارادى. بىراق نەگىزگى سۇراق باسقادا. توراعا شي رەسەيگە اسكەري كومەك بەرەمىن دەدى مە؟ جوق.

رەسەيدىڭ ۋكراينا اۋماقتارىن اننەكسيالاپ العانىن قولداپ ءبىر اۋىز ءسوز ايتتى ما؟ جوق.

ول قازىر سانكتسيالارعا بايلانىستى رەسەيگە جەتپەي جاتقان چيپتەر مەن باسقا دا جوعارى تەحنولوگيالىق تاۋارلاردى جەتكىزۋگە ۋادە بەردى مە؟ تاعى دا جوق.

ونىڭ ورنىنا رەسەي ۇكىمەتى مەن قىتاي ۇكىمەتى اراسىنداعى تەلەباعدارلامالاردى بىرلەسىپ شىعارۋ سالاسىنداعى ىنتىماقتاستىق تۋرالى كەلىسىم مەن يندۋستريا جانە ساۋدا مينيسترلىگى اراسىنداعى ءوزارا تۇسىنىستىك تۋرالى مەموراندۋمدى قوسا العاندا، بارلىعى 14 دانا كۇماندى قۇجاتتارعا قول قويىلدى. رەسەي مەن قىتايدىڭ ساۋدا مينيسترلىگى كورمە-جارمەڭكە قىزمەتى سالاسىنداعى ىنتىماقتاستىقتى تەرەڭدەتۋ تۋرالى كەلىستى.

رەسەيلىك گاز ەندى قىتايعا كەدەرگىسىز، بەيجىڭ ءۇشىن ەڭ قولايلى باعامەن جەتكىزىلەدى. ءتىپتى، ۆلاديمير پۋتين قىتاي توراعاسى شي جينپيڭگە ازيا، افريكا جانە لاتىن امەريكاسىنىڭ باسقا ەلدەرىمەن ساۋدادا يۋانعا اۋىسقىسى كەلەتىنىن جەتكىزدى.

توراعا شي سىپايى كۇلىمسىرەپ، ءپۋتيننىڭ بۇل ۇسىنىسىن تىڭدادى، بىراق بەيجىڭنىڭ ماسكەۋ ءۇشىن نە ىستەي الاتىنىن ايتپادى. ول رەسەي پرەزيدەنتىنە نە بەرەتىنىن ناقتى ايقىنداماي، ورىس-قىتاي دوستىعىنىڭ «التىن ءداۋىرى» باستالعانىن جاريالاپ، ءوز ەلىنە كەتتى.

قىتاي رەسەيدىڭ بەيجىڭگە «كىشى سەرىكتەس» بولۋىنا رۇحسات بەردى. سونىمەن بىرگە ماسكەۋدى حالىقارالىق ارەنادا قولداۋعا ەلەۋلى مىندەتتەمە المادى.

بۇقارالىق اقپارات قۇرالدارىنىڭ رەسمي حابارىنا قاراعاندا، بۇل قازىر كرەمل ءۇشىن ەرەكشە ماقتانىش جانە رەسەي باسشىلىعىنىڭ سىرتقى ساياساتتاعى كەرەمەت تابىسىنىڭ ءبىرى. دەگەنمەن شي توراعا ايتقان «التىن ءداۋىر» تەك قىتاي ءۇشىن ورناماق. ول جەردە رەسەيگە ورىن جوق.

كەرىمسال جۇباتقانوۆ

Abai.kz