توقاەۆ: «بۇل – كۇللى مۇسىلمان قاۋىمى ءۇشىن ءمان-ماڭىزى ايرىقشا مەزگىل»
مەملەكەت باسشىسى قاسىم-جومارت توقاەۆ قازاقستاندىقتاردى رامازان ايىنىڭ باستالۋىمەن قۇتتىقتادى.
"ارداقتى اعايىن! سىزدەردى قاسيەتتى رامازان ايىنىڭ باستالۋىمەن شىن جۇرەكتەن قۇتتىقتايمىن!
بۇل – كۇللى مۇسىلمان قاۋىمى ءۇشىن ءمان-ماڭىزى ايرىقشا مەزگىل.
ادامزاتتى رۋحاني تازارۋعا جانە جان-جاقتى كەمەلدەنۋگە باستايتىن وسى ايدا توزىمدىلىك، جاناشىرلىق، يماندىلىق سياقتى قۇندىلىقتار كەڭىنەن دارىپتەلەدى.
اتا-بابامىز رامازاندى «ون ەكى ايدىڭ سۇلتانى» دەپ ارداقتاعان. ورازا ۇستاعان جاماعاتقا اۋىزاشار بەرىپ، ءبىر-بىرىنە ەرەكشە قۇرمەت كورسەتكەن.
سالت-داستۇرىمىزبەن ساباقتاس اسىل ءدىنىمىز عاسىرلار بويى ۇلى دالادا ەلدىڭ بىرلىگىن جانە قوعامنىڭ تىنىشتىعىن ساقتاۋ جولىندا ماڭىزدى ءرول اتقارىپ كەلەدى.
مەيىرىمدىلىك ايىندا حالقىمىز يگى ىستەرىن ەسەلەپ، ساۋاپقا كەنەلە بەرسىن!
بارشاڭىزعا زور دەنساۋلىق، باق-بەرەكە تىلەيمىن!
ورازا قابىل بولسىن!",-دەدى پرەزيدەنت.
Abai.kz
