بەيسەنبى, 28 ناۋرىز 2024
ساڭلاق 5294 5 پىكىر 27 ناۋرىز, 2023 ساعات 12:38

تاريحي جەڭىس

قازاقستان فۋتبول قۇراماسى فينالدىق سىنى 2024 جىلى گەرمانيادا وتەتىن ەۋروپا چەمپيوناتىنىڭ ىرىكتەۋ ويىنىندا دانيا قۇراماسىن 3:2 ەسەبىمەن جەڭدى!

بۇل – قازاق فۋتبولشىلارىنىڭ دانيا كومانداسىمەن بەسىنشى رەت بەلدەسۋى بولاتىن. وسىعان دەيىنگى ءتورت ويىندا دا دات قۇراماسى جەڭىسكە جەتكەن ەدى. كەشە «استانا-ارەنادا» وتكەن كەزدەسۋدە دە اۋەلى قوناقتار قانجىعاسىن وڭاي مايلايتىنداي كورىنگەن. ولاردىڭ العى شەپتەگى جاس شابۋىلشىسى راسمۋس حەيلۋند 21 جانە 36-مينۋتتاردا ەكى گول سوعىپ، ءوز كومانداسىن العا شىعاردى. ءبىرىنشى تايم بىتكەندە «ءىرى ەسەپپەن ۇتىلىپ، ماسقارا بولماساق جارار ەدى» دەگەن ويعا بەرىلمەگەن قازاق جانكۇيەرى از بولماعان شىعار. دەگەنمەن ازداعان ءۇمىت تە جوق ەمەس-ءتى. ويتكەنى ماتچتىڭ العاشقى بولىگىندە ءبىزدىڭ جىگىتتەر، جالپى العاندا، جامان ويناماعان-دى.

ەكىنشى تايمدا قازاقستان قۇراماسى سول العان بەتىنەن تايعان جوق. وسىدان ءتورت اي بۇرىن عانا قاتار جاسىل الاڭدارىندا وتكەن الەمدىك دوپ دوداسىنا قاتىسقان مىقتى كومانداعا قارسى، قانشا قيىن بولسا دا، تايسالماي وينادى. اقىرىندا ءوز ايىپ الاڭىندا قولىمەن ويناعان يوناس ءۆيندتىڭ قاتەلىگىنەن سوڭ تورەشى پەنالتي بەلگىلەدى. ونى باقتيار زاينۋتدينوۆ مۇلتىكسىز ورىندادى. بۇل – ويىننىڭ 73-مينۋتى ەدى. الدا ءالى جيىرما شاقتى مينۋت بار. قازاقستان قۇراماسى ارىنىن ىرىكپەي، العا ۇمتىلا بەردى. 86-مينۋتتا كوماندا كاپيتانى اسحات تاعىبەرگەن 30 مەتردەي جەردەن عالامات سوققى جاساپ، كاسپەر شمەيحەل قورعاعان قاقپانىڭ تورىن بۇلك ەتكىزدى – ەسەپ تەڭەستى! ال ارادا نەبارى ءۇش مينۋت وتكەندە سول قاناتتان يان ۆوروگوۆسكي قارسىلاس ايىپ الاڭىنا اۋەلەتە تاماشا پاس تاستاپ ەدى، جاسىل الاڭعا سونىڭ الدىندا عانا شىققان ابات ايىمبەتوۆ باسپەن جەڭىس دوبىن سوقتى – 3:2!

«استانا-ارەناعا» جينالعان وتىز مىڭعا تارتا جانكۇيەردىڭ قۋانىشىندا شەك بولعان جوق. تەلەديدارعا تەلمىرگەن ميلليونداردىڭ دا جۇرەگى جارىلا جازداعانى انىق. ەندى شە، دانيا سەكىلدى داڭقتى كوماندانىڭ – وسدان ەكى جىل بۇرىن عانا ەۋروپا چەمپيوناتىنىڭ قولا جۇلدەسىن ولجالاعان مىقتى ۇجىمنىڭ ساعىن سىندىرىپ، ءۇش ۇپاي جىرىپ الۋ وڭاي ەمەس. «تاريحي جەڭىس» دەپ تاپسىرلەپ وتىرعانىمىز دا سوندىقتان.

ءبىرىنشى ويىندا، وكىنىشكە قاراي، سلوۆەنيادان 1:2 ەسەبىمەن جەڭىلىپ قالعان ەدىك. مىنا كەرەمەت جەڭىس سول وكىنىشتىڭ ۋىتىن قايتارعانداي بولدى. قازاقستان قۇراماسى كەلەسى ويىنىن 16 ماۋسىمدا سان-مارينوعا قارسى وتكىزەدى.

ساكەن سىبانباي

Abai.kz 

5 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1562
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2256
عيبىرات

قايسار رۋحتى عازيز جان

مۇحتار قۇل-مۇحاممەد 3525