باس اسكەري پروكۋراتۋرا وليگارح تيمۋر قۇلىباەۆتىڭ الماتىداعى 4 گا جەرىن مەملەكەت مەنشىگىنە قايتاردى.

«2014 جىلى الماتى قالاسى مەدەۋ اۋدانىنداعى  قۇنى 6 ملرد تەڭگەدەن استام، جالپى اۋدانى 3,8484 گا جەر ۋچاسكەسى «دوستىق ستروي» قۇرىلىس كومپانياسى جشس مەنشىگىنە ءوتتى. الايدا، بۇل ۋچاسكە جەتى جىل بويى پايدالانىلماعان. وسىعان وراي اسكەري پروكۋراتۋرا جەردى ماجبۇرلەپ قايتارىپ الۋعا ارىز جازدى. 2022 جىلعى 24 قاراشادا الماتى قالاسىنىڭ مامانداندىرىلعان اۋدانارالىق ەكونوميكالىق سوتىنىڭ شەشىمىمەن اسكەري پروكۋراتۋرانىڭ تالاپ-ارىزدارى قاناعاتتاندىرىلىپ، زاڭدى كۇشىنە ەندى»- دەلىنگەن حابارلامادا.

BES.Media Telegram ارناسىنىڭ جازۋىنشا، اتالعان جەر ۋچاسكەسى ەكس-پرەزيدەنت نۇرسۇلتان نازارباەۆتىڭ كۇيەۋ بالاسى، وليگارح تيمۋر قۇلىباەۆتىڭ مەنشىگى.

«دوستىق ستروي» جشس قۇرىلتايشىلارى Joint Technologies جانە «كيپروس» كومپانيالارى بولىپ سانالادى. بۇل ەكەۋى دە ميللياردەر، قر بۇرىنعى پرەزيدەنتى نۇرسۇلتان نازارباەۆتىڭ كۇيەۋ بالاسى تيمۋر قۇلىباەۆقا تيەسىلى. قايتارىلعان ۋچاسكە قۇلىباەۆقا 2012 جىلى اسكەري گوسپيتال عيماراتى اۋىسقاننان كەيىن بەرىلدى»، - دەپ جازدى ارنا.

سونداي-اق قۇلىباەۆقا MEGA ساۋدا ورتالىعىنا قاراما-قارسى ورنالاسقان روزىباكيەۆ كوشەسى مەن قوجابەكوۆ كوشەسى قيىلىسىنداعى 6,6 گا بوس جەر مەن ءال-فارابي اتىنداعى قازۇۋ-دىڭ جەرىنىڭ ءبىر بولىگى تيەسىلى.

Abai.kz