توقاەۆ ءوزى باسقاراتىن اكىمشىلىك شەشىمدەرى مەن زاڭنامالارداعى وزگەرىستەردى ساپالى ساياسي رەفورما دەپ كورسەتۋگە تىرىستى. بيلىكتى سىناۋشىلار مۇنداي بولماشى وزگەرىستەردەن ەشقانداي پايدا جوق، ولار بيلىكتى پرەزيدەنت قولىنا جۇمىلدىرۋدى كوزدەيدى دەپ وتىر.
توقاەۆ بولسا "كونستيتۋتسيالىق رەفورمالار ارقىلى بۇكىل جۇيەنى وزگەرتەتىن قادامدار جاسالدى" دەپ ەسەپتەيدى.
"پرەزيدەنت جەتى جىلعا ءبىر رەت قانا سايلاناتىن بولدى. سونداي-اق پارلامەنتتىڭ قۇزىرەتى مەن قىزمەتى قايتا قارالدى. دەپۋتاتتاردىڭ ءرولى ەداۋىر كۇشەيدى. كونستيتۋتسيالىق سوت قۇرىلدى. بۇكىل سوت جۇيەسىنە تۇبەگەيلى رەفورما جاساۋ باستالدى", - دەپ مالىمدەدى مەملەكەت باسشىسى.
توقاەۆ سايلاۋ كەزىندەگى كوپتەگەن زاڭبۇزۋزىلىقتار تۋرالى ەشتەڭە ايتپادى، تەك "سايلاۋ ناۋقانى كەزىندە كوپتەگەن ورىندى سىن، بايىپتى ۇسىنىس ايتىلدى" دەۋمەن شەكتەلدى. پرەزيدەنتتىڭ پىكىرىنشە، "بۇل ناۋقان، شىن مانىندە، بۇرىنعىدان ەرەكشە، وزگەشە بولدى، سايلاۋ ناۋقانى شىنايى باسەكە جاعدايىندا، اشىق ءوتتى".
سارسەنبى كۇنى پارلامەنت عيماراتىنا جاقىن ماڭعا مەتالل قورشاۋلار ورناتىلدى. قازاقستاننىڭ ءتۇرلى وڭىرلەرىندە سايلاۋ ناتيجەسىمەن كەلىسپەيتىندەر نارازىلىق اكتسياسىن وتكىزەمىز دەپ جاتقان ۋاقىتتا قاۋىپسىزدىك شارالارى كۇشەيتىلىپ وتىر.
توقاەۆ 2019 جىلى پرەزيدەنت قىزمەتىنە كىرىسكەلى بەرى ەلدە ەكى پارلامەنت سايلاۋى ءوتتى. 19 ناۋرىزداعى سايلاۋ نۇرسۇلتان نازارباەۆ بيلىك پارتياسى مەن قاۋىپسىزدىك كەڭەسىنىڭ باسشىسى قىزمەتىنەن كەتكەننەن كەيىن ۇيىمداستىرىلعان العاشقى ساياسي ناۋقان بولدى.
باقىلاۋشىلار سايلاۋ كەزىندە بيۋللەتەندەردى جاشىككە قوس-قوستاپ تاستاۋ، "كارۋسەل" ۇيىمداستىرۋ سەكىلدى زاڭ بۇزۋشىلىقتار بولعانىن ايتتى. بيلىك ۇساق زاڭ بۇزۋشىلىقتار "سايلاۋ ناتيجەسىنە اسەر ەتپەدى" دەپ مالىمدەدى.
19 ناۋرىزدا وتكەن ءماجىلىس پەن ءماسليحاتتى كەزەكتەن تىس سايلاۋدا پارتيالىق ءتىزىم بويىنشا دا، ءبىرمانداتتى وكرۋگتەر بويىنشا دا كوپ ورىندى بيلىكتەگى "امانات" پارتياسى (40 ورىن) يەلەندى. ماجىلىسكە پارتيالىق تىزىممەن "امانات", قحپ،"اق جولدان" بولەك، "اۋىل" (10 ورىن), "رەسپۋبليكا" (6 ورىن), جسدپ (4 ورىن) وتكەن.
حالىقارالىق ۇيىمدار قازاقستان بيلىگى شىنايى قارسىلاس بولاتىن وپپوزيتسيالىق توپتاردى سايلاۋعا وتكىزبەدى دەپ مالىمدەگەن.
Abai.kz
