قر ەكس-پرەزيدەنتى ن.ءا.نازارباەۆقا ءۇش ساۋال:

قۇرمەتتى نۇرسۇلتان ءابىشۇلى!

30 جىل قازاقستاننىڭ ءبىرىنشى باسشىسى بولدىڭىز، جۇزدەگەن عىلىمي ەڭبەكتەرىڭىز بار. بيلىك باسىندا وتىرعاندا جاريالاعان پايىم-تۇجىرىمدارىڭىز عالىمدار قاۋىمى تاراپىنان مەملەكەتتىك تاپسىرىسپەن، تەوريالىق-مەتودولوگيالىق نۇسقاۋمەن بىردەي قابىلداندى.

دەگەنمەن، اقيقاتتىڭ سوڭعى نۇكتەسىن قوياتىن قۇدىرەت ۋاقىت پەن پراكتيكا ەكەنىن ەشكىم بەكەر دەي الماس. زەينەتكەرلىككە شىققاننان بەرگى ۋاقىت ىشىندە ءار جىلدارعى عىلىمي-تانىمدىق ۇستانىمدارىڭىزدى، ۇلان-عايىر تاجىريبەڭىزدى، تاۋەلسىزدىكتىڭ بەرگەنى مەن جوعالتقانىن وي ەلەگىنەن  وتكىزگەن دە بولارسىز.

وسى ورايدا ۇلتتىق تاريحىمىزدا بۇرىننان كەلە جاتقان ءداستۇردى جالعاستىرعىمىز كەلەدى. 1912 جىلى شاكارىم قاجى قازاق وقىعاندارىنا 5 ساۋال قويعان ەدى. 1926  جىلى ماسكەۋدە وقىپ جاتقان قازاق ستۋدەنتتەرى دە ت.رىسقۇلوۆ سىندى ۇلت ماقتانىشتارىنا ماڭىزى زور سۇراقتارمەن قايىرىلعانى بەلگىلى. سول ساۋالدار كۇنى بۇگىنگە دەيىن عىلىمي ىزدەنىستەر مەن حالىق جادىنا وڭ ىقپالىن تيگىزۋدە.

ءبىز دە سىزگە ءۇش ساۋال قويۋدى ءجون سانادىق. ولار ءاربىر قازاقستاندىقتىڭ جۇرەگى مەن ساناسىنا جاقىن ماسەلەلەردى قامتيدى.

سونىمەن، سىزدەن بىلگىمىز كەلەتىنى:
2005 جىلى: «قازاقستاندا، قازاقتاردا ەشقاشان شەكارا دا، مەملەكەتتىلىك تە بولعان ەمەس» دەدىڭىز. وسى ويىڭىزدى 2011 جىلى جانە قايتالادىڭىز.
ءسىزدىڭ سوزىڭىزگە سۇيەنگەن رف پرەزيدەنتى ۆ.ۆ. پۋتين، ءبىزدىڭ ەلدىڭ بىرەن-ساران ازاماتتارى قازاق مەملەكەتى بولعان جوق دەگەندى ۇزدىكسىز ايتىپ كەلەدى. ەندەشە مىناعان تۇسىنىكتەمە بەرىڭىزشى:

1. قازاق شەكاراسى مەن مەملەكەتتىلىگىنە قاتىستى ۇستانىمدارىڭىز ەندىگى وزگەردى مە، جوق الدە سول كۇيىندە قالدى ما؟

2. تاۋەلسىز قازاقستان مەملەكەتىن قۇرۋ بارىسىندا ورىن العان ورەسكەل كەمشىلىك، باستى قاتەلىك دەپ نەنى ايتار ەدىڭىز؟

3. «تۇڭعىش پرەزيدەنت جانە ۇلت كوشباسشىسى رەتىندە مەنىڭ بورىشىم – حالقىمىزدى تاۋەلسىزدىكتىڭ تار جول، تايعاق كەشۋىنەن الىپ ءوتۋ» دەگەن ءسوزىڭىز ەسىمىزدە. قالاي ويلايسىز، بورىشىڭىزدى تولىق اتقارا الدىڭىز با؟

ءسىزدىڭ جاۋابىڭىز قوعامدىق-تاريحي ساناداعى اقتاڭداقتار مەن الا-قۇلالىقتى ەڭسەرۋگە نەگىز بولارى كۇمانسىز.

قۇرمەتپەن:

حانكەلدى ءابجانوۆ، ۇعا اكادەميگى،
بەرەكەت كارىباەۆ، ۇعا اكادەميگى،
عابيت كەنجەباەۆ، ۇعا مۇشە-كوررەسپوندەنتى،
نۇرلان اتىعاەۆ، تاريح عىلىمدارىنىڭ كانديداتى

Abai.kz