ورال قالاسى اكىمدىگى مەن «كۋبلەي» زاۋىتىنىڭ اراسىنداعى داۋلى ءىسى ءالى شەشىمىن تاپپادى. ەندى «كۋبلەي» زاۋىتى ورال اكىمدىگىن جوعارى سوتقا بەرۋگە بەكىنىپ وتىر.

«كەزەكتى قادامىمىز زاڭ بويىنشا كاسساتسيالىق شاعىم بەرۋ. ويتكەنى قابىلدانعان شەشىم زاڭسىز.

بىزدە 3 نەگىز بار. ءبىرىنشىسى – زاڭ جۇزىندە ەگجەي-تەگجەي جوسپارى ورال قالاسىنىڭ باس جوسپارىنا قايشى كەلمەۋى كەرەك. باس جوسپار بويىنشا وندىرىستىك اۋماققا تۇرعىن ءۇي سالۋعا بولمايدى.

ەكىنشىسى – زاۋىتتىڭ سانيتارلىق قورعاۋ ايماعى تەكتەن تەك بەلگىلەنبەگەن. سونداي-اق سانيتارلىق قورعاۋ ايماعى دەپ تانىلعان قورىتىندىنىڭ كۇشى جويىلماعان. ونى دا سوت ەسكەرىپ وتىرعان جوق.

ءۇشىنشى نەگىز – اكىمدىك ەگجەي-تەگجەي جوسپارىن جايدان جاي قابىلداي المايدى. ول ارنايى پروتسەدۋرادان ءوتۋى كەرەك. ال ول پروتسەدۋرالار جاسالماعان ءارى ونى سوت پروتسەسىنە اكەلىپ دالەلدەگەن دە جوق. وسىعان قاراماستان سوت وسىنداي زاڭسىز شەشىم قابىلداپ وتىر»، - دەيدى «كۋبلەي» جشس زاڭگەرى جانىبەك باشانوۆ.

بۇرىن بەلگىلى بولعانداي، «يرمەنوۆا» جەكە كاسىپكەرلىگى «كۋبلەي» زاۋىتىنىڭ سانيتارلىق اۋماعىن باسا-كوكتەپ، «تسيولكوۆسكي» تۇرعىن ءۇي كەشەنىن زاڭسىز سالىپ تاستاعان. وعان اكىمدىك رۇحسات بەرگەن. بۇگىندە «تسيولكوۆسكيدىڭ» تۇرعىندارى پاتەر قۇجاتتارىن الا الماي ءجۇر.

«كۋبلەي» زاۋىتىنىڭ زاڭگەرى «قۇرىلىس كومپانياسى مەن اكىمدىك ەكى وتتىڭ ورتاسىندا قالعان تۇرعىنداردى بىزگە ايداپ سالىپ وتىر» دەيدى.

«ءبىزدىڭ ءبىرىنشى ۇيگە ەشقانداي نارازىلىعىمىز جوق. سول ۇيدە 100 پاتەردەي بار. ءۇي سالىنىپ ءبىتتى. جەكەمەنشىك قۇقىقتارى بار. ولاردىڭ سوت پروتسەسىنە نەلىكتەن كەلىپ جاتقانى بىزگە تۇسىنىكسىز. ولار ادەيى قاتىسىپ جاتىر. بىرەۋدىڭ تاپسىرماسىمەن. «كەلىڭدەر، نارازىلىق بىلدىرىڭدەر» دەپ وتىرعان ادامدار بار. ال ءۇشىنشى-ءتورتىنشى ءۇي سالىنىپ بىتكەن جوق. ول جەردە ەشكىم تۇرمايدى. ەكىنشى ۇيدەگى 30 پاتەردە تۇرىپ جاتقاندار بار.

2020 جىلى سوت شەشىمى ءبىزدىڭ پايدامىزعا شەشىلگەن كەزدە ءدال وسى ەكىنشى ءۇي سالىنىپ بىتپەگەن ەدى. ولار سول سوت شەشىمى كۋبلەيدىڭ پايداسىنا شەشىلسە دە، زاڭسىز ەكىنشى ءۇي سالدى. ول ۇيگە زاڭسىز كوممۋنيكاتسيا قوسىلدى. كارىز جۇيەسى، سۋ، جارىق، جىلۋ قوسىلدى. 30 پاتەرىنە ادام كىرگىزىلدى. اكىمدىك وسىعان ادەيى جول بەردى. قازىرگى كۇنى سول 30 پاتەر ءۇشىن وسىنداي ۇلكەن داۋ بولىپ جاتىر»، - دەدى «كۋبلەي» جشس زاڭگەرى جانىبەك باشانوۆ.

سوتتا «يرمەنوۆا» جەكە كاسىپكەرلىگىنىڭ ءۇيدى زاڭسىز سالعانىن قالا قۇرىلىسىن باقىلاۋ باسقارماسىنىڭ مامانى دا راستادى.

«2020 جىلى قاڭتاردا «يرمەنوۆا» جەكە كاسىپكەرلىگىنە قاتىستى تەكسەرۋ جۇرگىزىلدى. ونىڭ ناتيجەسى بويىنشا جەكە كاسىپكەر يرمەنوۆا جانار ساپارقىزى جىبەرىلگەن زاڭ بۇزۋشىلىقتار ءۇشىن اكىمشىلىك تاراپىنان جاۋاپكەرشىلىككە تارتىلدى. ماسەلەن جوبالاۋ-سمەتالىق قۇجاتتامانىڭ جانە ساراپتامانىڭ وڭ قورىتىندىسى بولعان جوق. وعان قوسا، قۇرىلىس-مونتاجداۋ جۇرگىزۋ ءىسى باستالعانى تۋرالى حابارلاما دا بولماعان. سونداي-اق ساۋلەت، قالا قۇرىلىسى تۋرالى زاڭنامادا كوزدەلگەن تەحنيكالىق جانە اۆتورلىق قاداعالاۋلاردىڭ بولماعانى انىقتالدى.

تەكسەرۋ ناتيجەسى بويىنشا كاسىپكەرگە قاتىستى بۇزۋشىلىقتاردى جويۋ تۋرالى ۇيعارىم ەنگىزىلدى. اتاپ ايتقاندا قۇرىلىس مونتاجداۋ جۇمىسىن توقتاتۋ جانە جوعارىدا اتالعان زاڭبۇزۋشىلىقتاردى تۇگەل جويۋ قاجەت.

بىراق قۇرىلىستىڭ توقتاتىلعانى تۋرالى حابارلاما كەلگەن جوق. دەسە دە جانار ساپارقىزى 4 ۇيگە ارنالعان 4 جوبانى ازىرلەگەنىن اتاپ وتكىم كەلەدى. 4 جوباعا ساراپتاما جۇرگىزىلدى جانە 2020 جانە 2021 جىلدارى قۇرىلىس مونتاجداۋ جۇمىسىن جۇرگىزۋدى باستاۋعا قاتىستى حابارلاما بەرىلدى. الايدا بۇل حابارلامالار 2020 جىلدىڭ 28 جەلتوقسانىنان باستاپ قابىلدانبادى. وعان جەردى پايدالانۋ ماقساتىن وزگەرتۋ سەبەپ بولدى. بۇگىنگى تاڭدا سوت داۋلارىنا بايلانىستى قۇرىلىس-مونتاجداۋ جۇمىسى جۇرگىزىلمەي تۇر»، - دەدى ورال قالاسى قالا قۇرىلىسىن باقىلاۋ باسقارماسىنىڭ مامانى كەنجەبەك احمەتوۆ»،- دەدى ورال قالاسى قالا قۇرىلىسىن باقىلاۋ باسقارماسىنىڭ مامانى كەنجەبەك احمەتوۆ.

سونداي-اق سوتتا سانيتاريالىق باقىلاۋ باسقارماسىنىڭ جەتەكشىسى «كۋبلەي» جشس-ءنىڭ سانيتارلىق قورىتىندىسىنىڭ بار ەكەنىن جانە ونىڭ اۋماعى كەمى 100 مەتر ەكەنىن راستادى.

«2015 جىلى 4 قاراشادا «كۋبلەي» جشس سانيتارلىق قورعاۋ ايماعىنا قاتىستى ەڭ العاش ءبىزدىڭ سانيتارلىق-ەپيدەميولوگيالىق قورىتىندىنى الدى. وعان سايكەس قالادا تۇرعان كونسەرۆى زاۋىتى «كۋبلەي» جشس ءبىزدىڭ قورىتىندىمىز بويىنشا ءتورتىنشى قاۋىپتىلىك كلاسىنا جاتادى. ونىڭ سانيتارلىق قورعاۋ ايماعى مينيمالدى 100 مەتردەن اسپاۋى كەرەك. 2015 جىلى قورىتىندىنى العان ۋاقىتتا ءبىز ارنايى ورىنعا بارماي، ىشتە وتىرىپ، ارنايى جوباعا سۇيەنىپ جۇرگىزەتىنبىز. جوبا بويىنشا بارلىق قورعاۋ ايماقتارى بولدى. ارنايى قورعاۋ ايماعى الدىن الا جىكتەلدى، جوبا بويىنشا 100 مەترى بەلگىلەندى. جالپى قورىتىندىنى ءبىر رەت الا الادى. سانيتارلىق قورعاۋ اۋماعىن بەلگىلەۋ باس جوسپارمەن بەكىتىلگەن نورما»، - دەدى ورال قالاسى سانيتاريالىق باقىلاۋ باسقارماسىنىڭ جەتەكشىسى گاۋھار دۇيسەعاليەۆا.

زاڭگەر ەۆگەني پريتسكەردىڭ ايتۋىنشا، 2016 جىلدان بەرى ۇلەسكەرلەردىڭ ماسەلەسىنە قاتىستى داۋعا تىكەلەي جەرگىلىكتى اكىمدىك جاۋاپتى. ياعني «تسيولكوۆسكي» تۇرعىن ءۇي كەشەنىنە اقشا قۇيىپ، ونى زاڭدى تۇردە راسىمدەي الماي وتىرعان تۇرعىنداردىڭ ماسەلەسىنە تىكەلەي ورال قالاسى اكىمدىگىنىڭ جاۋاپتى ەكەنىن العا تارتىپ، قىلمىستىق قۇرامنىڭ بار ەكەنىنە باسا نازار اۋدارۋ قاجەت ەكەنىن ايتتى.

وسىعان دەيىن قر يندۋستريا جانە ينفراقۇرىلىمدىق دامۋ مينيسترلىگىنە قاراستى كوميتەت وندىرىستىك ايماقتا تۇرعىن ءۇي سالۋعا تىيىم سالىنعان دەپ ناقتى كورسەتكەن بولاتىن. سونداي-اق قر دەنساۋلىق ساقتاۋ مينيسترلىگىنە قاراستى سانيتارلىق-ەپيدەميولوگيالىق باقىلاۋ كوميتەتىنىڭ سوتقا «كۋبلەي» زاۋىتىنىڭ سانيتارلىق قورعاۋ ايماعى بار، ول اۋماق كەمىندە 100 مەتر بولۋى ءتيىس جانە وندا تۇرعىن ۇيلەردى سالۋعا تىيىم سالىنعان دەگەن جاۋاپ جولداعان.

بۇدان بولەك، اۋىل شارۋاشىلىعى مينيسترلىگى دە زاۋىتتىڭ جابىلۋى نارىققا سوققى بەرەتىنىن مالىمدەگەن ەدى. مينيسترلىك «كۋبلەي» زاۋىتىنا تونگەن قاۋىپ ەلدەگى اۋىل شارۋاشىلىعى سالاسىنا تىكەلەي كەرى اسەرىن تيگىزەدى، زاۋىتتىڭ پروبلەماسى شەشىلمەسە قازاقستاندا قايتا وڭدەۋ سالاسى قۇلدىراپ، اۋىل شارۋاشىلىعىنىڭ باسەكەگە قابىلەتى تومەندەيتىنىن ايتقان. بۇگىندە اتالعان زاۋىتقا ەكى جارىم مىڭنان استام شارۋا قوجالىعى مال وتكىزىپ وتىر.

Abai.kz