باس اسكەري پروكۋروردىڭ ءبىرىنشى ورىنباسارى ماقسات قازيەۆتىڭ بەرگەن مالىمەتى بويىنشا، 2020 جىلدان بەرى ەلىمىزدە 270 اسكەري قىزمەتشى قايتىس بولعان. 2020 جىلى – 78, 2021 جىلى – 96, 2022 جىلى – 85 جانە 2023 جىلدىڭ باسىنان باستاپ – 11 اسكەري قىزمەتشى كوز جۇمعان.

«ولاردىڭ 36 پايىزى دەرتتەن، 24 پايىزى جول-كولىك وقيعاسىنان قازا تاپسا، 20 پايىزى ءوزىن-ءوزى ولتىرگەندەر.

اسكەردەگى سۋيتسيد ءبارىمىزدى الاڭداتادى. سۋيتسيد پروفيلاكتيكاسىن تالداۋ ناتيجەسى اسكەرىمىزدىڭ قوعامنىڭ ءبىر بولىگى رەتىندە جاعىمسىز جاعدايعا تاۋەكەلى بارىن كورسەتتى. ءارتۇرلى مالىمەتتەر بويىنشا، قازاقستان سۋيتسيد دەڭگەيىنەن الەمنىڭ 20 ەلىنىڭ قاتارىندا تۇر، ونىڭ ىشىندە جاسوسپىرىمدەر ءسۋيتسيدى بويىنشا ۇشتىكتە»، - دەدى ول.

قۇقىقتىق ستاتيستيكا كوميتەتىنىڭ رەسمي دەرەكتەرىنە ساي  2018-2022 جىلدارى ەلدە 17 631 سۋيتسيد فاكتىسى، 21 332 ءوزىن-ءوزى ولتىرۋگە وقتالۋ فاكتىسى تىركەلگەن. سوندا 10 مىڭ ازاماتتىڭ 9-ى سۋيتسيد جاساپ، 11-ءى سۋيتسيد ارەكەتىن جاسايدى.

«ونىڭ ىشىندە 86 سۋيتسيد پەن 20 سۋيتسيد جاساۋعا وقتالۋ ارەكەتى اسكەردە كەزدەسەدى. 10 مىڭ اسكەري قىزمەتشىنىڭ 6 –ى سۋيتسيد جاسايدى، 1-ءى ءوزىن-ءوزى ولتىرۋگە تىرىسادى. دەمەك، قوعامداعى ءوز-وزىنە قول سالۋ كوبىنەسە اسكەردە بولادى دەگەن پىكىر رەسمي مالىمەتتەرمەن راستالماي وتىر»، - دەپ تۇيىندەدى ماقسات قازيەۆ.

Abai.kz