جاس اقىندار مەن جازۋشىلاردىڭ شىعارماشىلىق دامۋىنا بۇرىنعىدان دا ۇلكەن قولداۋ كورسەتىلمەك. جاڭا قىزمەتكە تاعايىندالعان جازۋشىلار وداعىنىڭ باسقارما توراعاسى مەرەكە قۇلكەنوۆ وسىنداي مىندەت قويىپ وتىر. 

ونىڭ ايتۋىنشا، بۇعان دەيىن وداققا مۇشەلىككە كىرۋگە ءوتىنىش بىلگەندەردىڭ جاس ەرەكشەلىكتەرىنە شەكتەۋ قويىلىپ كەلسە، ەندى ونداي تالاپ بولمايدى. بۇل ەلىمىزدە جاڭا قالامگەرلەر ەسىمىن قالىپتاستىرۋعا مۇمكىندىك بەرمەك.

«بۇرىن جازۋشىلار وداعىندا جاستاردىڭ ۇلەس سالماعى مۇلدە از بولاتىن» دەيدى اقىن بەيبىت سارىباي. كەيىنگى بەس جىلدىقتا ولاردىڭ سانى كوبەيگەن. جاڭا باسشىلىق قۇرام «سۇرانىسقا ساي، جاستاردىڭ ۇسىنىسىنا دا اشىقپىز» دەپ وتىر. سونداي-اق قازىرگى قازاق ادەبيەتىنە بەت بۇرىپ كەلە جاتقان جاستار اراسىنداعى كەمشىن تۇستارعا دا توقتالدى.

– جاستاردىڭ رومانعا بارۋى نەكەن-ساياق. مىسالى، جيىرما جاستىڭ بىرەۋى، ءتىپتى ەلۋىنىڭ بىرەۋى رومانعا بارۋى مۇمكىن. ءبىر جىلدا كەم دەگەندە 5 جاس جازۋشىنىڭ رومان جازۋىنا جاعداي جاساعىمىز كەلىپ وتىر جانە سوعان ءبىر سەبەپكەر بولساق دەيمىز. جاستارمەن ساناسىپ، تالاپ-تىلەگىن ەسكەرىپ، قۇقىعىن قورعاۋ كەرەك، – دەيدى قازاقستان جازۋشىلار وداعى باسقارما توراعاسىنىڭ ورىنباسارى بەيبىت سارىباي.

ال ادەبيەت سىنشىسى ءامىرحان مەڭدەكە وداق جۇمىسىن وڭتايلاندىرۋ ءۇشىن ادەبي قوردى قايتا قۇرۋ كەرەك ەكەنىن ايتتى. ونىڭ ايتۋىنشا، بۇرىن جۇمىس ىستەگەن بۇل جۇيە تالاي جاس جازۋشىعا الەۋمەتتىك قولداۋ كورسەتكەن. كەيىنگى جىلدارى قور جۇمىسى تۇرالاپ قالعانىن ايتتى.

– ادەبي قوردى قايتادان جاساقتاپ، جاڭارتىپ، قۇرۋ كەرەك. ونىڭ مەحانيزمدەرىنىڭ ءبارى بەلگىلى. ال جاڭادان سايلانعان توراعا مەرەكە قۇلكەنوۆ تاجىربيەلى جازۋشى جانە بيزنەستەن دە حابارى مول. ەگەر ول قولعا السا، ادەبي قوردى قايتا قۇرىپ، ءىسىن جانداندىرادى دەگەنگە سەنىمىم مول، – دەدى جازۋشى، ادەبيەت سىنشىسى ءامىرحان مەڭدەكە.

«قالام – كيەلى قۇندىلىق. ءسوز قۇدىرەتى حالىقتى ىدىراتا دا، بىرىكتىرە دە الادى» دەگەن پرەزيدەنت قاسىم-جومارت توقاەۆ قازاق ادەبيەتىنىڭ كەنجە قالىپ قويماي، كوش ىلگەرى دامىپ وتىرۋ كەرەك ەكەنىن ءوز رەفورماسىندا تالاي تىلگە تيەك ەتكەن ەدى.

– ۇكىمەت پەن مەملەكەتتىك مەكەمەلەر اراسىندا بىرنەشە جۇمىس جاسالىپ جاتىر. ال ادەبيەتتىڭ دامۋى حالىقتىڭ يگىلىگىنە جۇمسالادى. سول باعىتتا كوپ جوبا جاسالىپ جاتىر، – دەدى قازاقستان جازۋشىلار وداعى باسقارما توراعاسىنىڭ ورىنباسارى، اقىن عالىم قاليبەكۇلى.

ەل بولىپ اتسالىسقان جاڭا رەفورمانىڭ قابىلدانعانىنا ءبىر جىلعا جۋىقتادى. جازۋشى، قازاقستان جازۋشىلار وداعىنىڭ باسقارما توراعاسى مەرەكە قۇلكەنوۆ «از ۋاقىتتا اتقارىلعان شارۋا كوپ» دەيدى. ونىڭ ايتۋىنشا، پرەزيدەنت بەكىتكەن رەفورما ءبىر جىلدىق جۇمىس ەمەس. ول – ءار سالا ماماندارىنىڭ قاجىرلى ەڭبەگى مەن سۇبەلى ناتيجەسىنىڭ جەمىسى.

– جاڭا قازاقستاندى قۇرۋ ماسەلەسىندەگى ۇلكەن قۇجات. ءبىر جىل بولدى، تالاي دۇنيە جاسالىپ جاتىر. ۇكىمەت پەن حالىق اراسىنداعى الشاقتىق جاقىنداپ كەلەدى. بۇرىنعى كەتكەن قاتەلىكتەردى تۇزەتۋ، شەتەلگە كەتكەن قارجى، قولدى بولعان نىساندار، يگەرىلمەگەن جەر سىندى ماسەلەلەر شەشىمىن تاۋىپ جاتىر. مۇنىڭ ءبارى كىم ءۇشىن كەرەك؟ ارينە، قازاق دەگەن حالىققا كەرەك، – دەدى قازاقستان جازۋشىلار وداعىنىڭ باسقارما توراعاسى، جازۋشى مەرەكە قۇلكەنوۆ.

ءار سالاداعى وزگەرىس، ساياسي ومىردەگى جاڭاشىلدىق – پرەزيدەنت پارمەنىنىڭ ىسكە اسىپ جاتقانىنىڭ ايقىن دالەلى.

Abai.kz