قر پرەمەر-ءمينيسترى ءاليحان سمايىلوۆتىڭ توراعالىعىمەن وتكەن، ورتالىق مەملەكەتتىك ورگاندار، الماتى قالاسى جانە الماتى وبلىسى اكىمدىكتەرى، باس پروكۋراتۋرا، بقدا، قما جانە باسقا دا ۆەدومستۆولار باسشىلارى قاتىسقان كەڭەستە رەسپۋبليكاداعى ءىرى ساۋدا ورنى «التىن وردا» بازارى جۇمىسىنىڭ وزەكتى ماسەلەلەرى قارالدى.

بازاردا 5 مىڭنان استام ساۋدا ورنى بار، وعان كەلۋشىلەر كۇنىنە شامامەن 50 مىڭ ساتىپ الۋشىعا جەتەتىنى اتاپ ءوتىلدى. بازار الماتى قالاسى مەن الماتى وبلىسىنداعى كوكونىس، ەت ونىمدەرى مەن جەمىستەردىڭ كوتەرمە ساۋداسىنىڭ 40%-ىن جانە بولشەك ساۋداسىنىڭ 70%-ىنا دەيىن قامتيدى. وعان تاۋاردى نەگىزگى جەتكىزۋشىلەر وتاندىق وندىرۋشىلەرمەن قاتار كورشىلەس ەلدەردىڭ كومپانيالارى.

سونىمەن قاتار كۇندەلىكتى ءونىمنىڭ ۇلكەن اعىنىن ەسكەرە وتىرىپ، بازاردا ايماقتىق اۋقىمدا باقىلانبايتىن وليگوپوليا قۇرىلادى. باس پروكۋراتۋرا جانە مەملەكەتتىك ورگاندارمەن تەكسەرۋ ناتيجەسىندە سانيتاريالىق، ۆەتەريناريالىق، ەكولوگيالىق، سۋ، ەڭبەك، ساۋلەت-قۇرىلىس، ورتكە قارسى، سالىقتىق باقىلاۋ، سونداي-اق باسەكەلەستىكتى قورعاۋ سالاسىندا 300-دەن استام قر زاڭناماسى نورمالارىن بۇزۋشىلىقتار انىقتالدى.

الماتى وبلىسى اكىمدىگىنىڭ دەرەكتەرى بويىنشا انىقتالعان زاڭ بۇزۋشىلىقتار ءىشىنارا جويىلدى. سونىمەن قاتار كاسىپكەرلەر تاراپىنان بيزنەس جۇرگىزۋگە قولايسىز جاعدايلار تۋرالى شاعىمدار سانى ارتقان، بۇل سايىپ كەلگەندە تاۋارلار باعاسىنىڭ نەگىزسىز وسۋىنە الىپ كەلەدى.

كەڭەس قورىتىندىسى بويىنشا پرەمەر-مينيستر قولدانىستاعى زاڭناماعا سايكەس تۇبەگەيلى شارالار قابىلداۋ قاجەتتىگىن اتاپ ءوتتى. اتاپ ايتقاندا، «التىن وردا» بازارىنىڭ قىزمەتىن رەتكە كەلتىرۋ جانە باعانى قالىپتاستىرۋدا اشىقتىقتى قامتاماسىز ەتۋ ماقساتىندا قوعامدىق باقىلاۋدى ۇيىمداستىرۋ، سونداي-اق ونىڭ اۋماعىندا بارلىق زاڭ بۇزۋشىلىقتار تولىعىمەن جويىلعانعا دەيىن پروكۋراتۋرا، ىشكى ىستەر ورگاندارى، بقدا، قما جانە باسقا دا ۋاكىلەتتى مەملەكەتتىك ورگاندار قىزمەتكەرلەرىنەن قۇرالعان تۇراقتى موبيلدىك توپ قۇرۋ تاپسىرىلدى.

سونىمەن قاتار الماتى اگلومەراتسياسىندا ساۋدا اعىندارىن تەڭەستىرەتىن جانە «التىن وردا» بازارىنىڭ باعا ساياساتىنا ىقپالىن ازايتاتىن بالامالى كوتەرمە-ساۋدا ورتالىقتارىن قۇرۋ بويىنشا جۇمىس جالعاسادى.

سۋرەت: tengrinews.kz

Abai.kz