"قازمۇنايگاز" تەكسەرۋى 29 مامىردا اياقتالعانىمەن، ۇلتتىق كومپانيا ونىڭ شەشىمىن ءالى جاريالاعان جوق. بۇل جونىندە 31 مامىردا ازاتتىققا مۇنايشىلار حابارلادى.
جاڭاوزەن مۇنايشىلارى تالاپتارى ورىندالماعانىن ايتىپ، 30 مامىردا الەۋمەتتىك جەلىدە ۆيدەوۇندەۋ جاريالاعان.
"زاڭسىز تەندەردىڭ" سەبەبىنەن ادىلەتسىزدىكپەن كۇرەسىپ جۇرگەنىمىزگە 60 كۇن بولدى. استانا قالاسىنا باردىق، ارنايى جاساق قاماۋعا الدى. سول كەزدە قۇزىرلى ورگاندار، "قازمۇنايگاز" باسشىلارى 10 ادامنان كوميسسياعا قالدىرىپ، ءبارىن شەشىپ بەرەدى دەگەن بولاتىن. تالاپتار: تۇراقتى جۇمىس، ايلىقتى تەندەر، بىردەي جالاقى جۇيەسى (ەسوت) بويىنشا تولەۋ، الگوريتمگە قوسىلىپ، "وزەنمۇنايگازعا" ەنشىلەس كومپانيالارعا اۋىسۋ، زاڭ جانە ەڭبەك قاۋىپسىزدىگى ەرەجەلەرىنە سايكەس جۇمىس ورنى بولدى", – دەيدى ۆيدەودا تالاپتى وقىپ تۇرعان ادام.
ولاردىڭ سوزىنشە، 29 مامىردا "وزەنمۇنايگازعا" تەكسەرۋ جۇرگىزىپ جاتقان "قازمۇنايگاز" ۇلتتىق كومپانياسىنىڭ كوميسسياسى قابىلدانعان شەشىم تۋرالى جاريا ەتپەستەن استاناعا كەتىپ قالعان. بۇعان نارازى بولعان مۇنايشىلار بيلىككە 15 ماۋسىمعا دەيىن مۇرسات بەرەتىنىن، ماسەلە شەشىلمەسە، استاناعا باراتىنىن مالىمدەدى.
ازاتتىق تىلشىسىنە "قازمۇنايگازداعىلار" كوميسسيا شەشىمىن ايتپادى، بىراق كومپانيا سايتىندا "بەرالى ماڭعىستاۋ Company" نارازىلارعا ء"مولدىر مۇناي سەرۆيس" سەرىكتەستىگىنەن جۇمىس ۇسىنعانىن، ولار "ويلانىپ جاتقانى" تۋرالى جازىلعان. بىراق "وزەنمۇنايگاز" الدىندا تۇرعاندار بۇل ءۋاجدى جوققا شىعارادى. ال ەنەرگەتيكا ءمينيسترى الماسادام ساتقاليەۆ كوميسسيا جۇمىسى نەمەن اياقتالعانىن بىلمەيتىنىن، بىراق مۇنايشىلار جالاقىسى باستى نازاردا بولاتىنىن ايتتى.
– مەردىگەرلىك كەلىسىمدەر تۇراقتىلىقتى ساقتاۋ ءۇشىن ءۇش جىلدان كوپ مەرزىمگە جاسالادى. تاريفتەردى كوتەرۋگە قاتىستى كوپ جۇمىس جۇرگىزىلدى. ەندى جالاقى قورىن تەندەردە ۇتۋ ءۇشىن جويىپ جىبەرمەۋى باقىلانادى. "وزەنمۇنايگازدىڭ" ساتىپ الۋلاردى باقىلاۋ، جۇمىسقا الۋ جانە باسقا سالالاردا ءىرى زاڭبۇزۋشىلىقتار انىقتالدى. مۇناي ەكونوميكانىڭ لوكوموتيۆى بولعاندىقتان، مۇنايشىلار جالاقىسى، الەۋمەتتىك جاعدايى "قازمۇنايگازدىڭ", "سامۇرىق-قازىنا" قورىنىڭ، باسقا باقىلاۋشى ورگانداردىڭ ەرەكشە نازارىندا بولۋعا ءتيىس دەپ ەسەپتەيمىز، – دەدى 30 مامىردا الماسادام ساتقاليەۆ ازاتتىققا.
ءساۋىردىڭ باسىندا "وزەنمۇنايگاز" كومپانياسىنىڭ مەردىگەرى "بەرالى ماڭعىستاۋ Company" كاسىپورنى تەندەردە جەڭىلىپ، 100-دەن استام ادام جۇمىسسىز قالعان. جاڭاوزەندە جۇمىس تالاپ كەتكەن مۇنايشىلار 10 ساۋىردە استاناعا كەلدى. ءبىر تاۋلىك ەنەرگەتيكا مينيسترلىگى الدىندا قونعان مۇنايشىلاردى 11 ساۋىردە كەشكە قاراي پوليتسيانىڭ ارنايى جاساعى كۇشتەپ ۇستاپ اكەتكەن. بۇدان سوڭ جاڭاوزەن مەن اقتاۋ تۇرعىندارى جانە الماتى، استانا مەن وزگە وڭىرلەردەگى بەلسەندى ازاماتتار ۇستالعان مۇنايشىلاردى بوساتۋدى تالاپ ەتتى.
12 ساۋىردە تاڭەرتەڭ مۇنايشىلاردىڭ كوبى پويىزبەن جاڭاوزەنگە قايتارىلىپ، 10 ادام كەلىسىم جۇرگىزۋ ءۇشىن استانادا قالعان. 20 ساۋىردە مۇنايشىلار قمگ كەلىسسوزدى توقتاتقانىن، تالاپتارى ءالى ورىندالماعانىن جەتكىزگەن. ال قمگ "ارنايى كوميسسيا" قۇرىلعانىن، جاڭاوزەندە مۇناي-گاز سالاسىنداعى كاسىپورىنداردىڭ جۇمىسى تەكسەرىلەتىنىن مالىمدەگەن.
استانادان جاڭاوزەنگە ورالعان نارازى مۇنايشىلار "وزەنمۇنايگاز" الدىنا قايتا جينالىپ، تۇراقتى جۇمىس تالاپ ەتكەن اكتسيانى ءالى جالعاستىرىپ كەلەدى.
سۋرەت: centralasian.org
Abai.kz
