سەناتور ولگا بۋلاۆكينا شىعىس قازاقستانداعى 15 مىڭنان استام تۇرعىندى سۋ باسۋ قاۋپى ءتونىپ تۇرعانىن ايتتى. 

دەپۋتاتتىڭ ايتۋىنشا، ۇيدەنە سۋ قويماسى 10 جىلعا جۋىق ۋاقىتتان بەرى اپاتتى جاعدايدا تۇر. 2017 جىلدان باستاپ بوگەتتى جاڭعىرتۋ جۇمىستارى باستالعان بولاتىن. الايدا قارجىلاندىرۋدىڭ بولماۋىنا بايلانىستى جوبا تەك 35%-عا ورىندالدى. دايىندالعان جوبالاۋ-سمەتالىق قۇجاتتاردىڭ مەرزىمى اياقتالدى، سونىمەن قاتار وندا باستى سۋاعاردىڭ نەگىزگى جوندەۋ-قالپىنا كەلتىرۋ جۇمىستارى قاراستىرىلماعان بولىپ شىقتى. ايماقتاعى باسقا دا بىرقاتار سۋ قويماسىندا كۇردەلى جاعداي قالىپتاسىپ وتىر.

«شىعىس قازاقستان وبلىسىنداعى بۇدان باسقا تاعى ەكى سۋ نىسانى بويىنشا دا وسىنداي جاعداي بولىپ وتىر. ماسەلەن، تارباعاتاي اۋدانىنىڭ قاندىسۋ سۋ قويماسى مەن كۇرشىم اۋدانىنىڭ ورتا-تەرەكتى سۋ قويماسى 2019-2021 جىلدار ارالىعىندا جوندەلۋى ءتيىس ەدى. بوگەتتەر تاسقىن سۋدان بۇزىلعان جاعدايدا سۋ باسۋ ايماعىندا 15,5 مىڭ ادام قالىپ قويادى. ماگيسترالدىق جانە شارۋاشىلىق ىشىلىك ارنالاردىڭ تەحنيكالىق جاي-كۇيىنىڭ ناشارلىعى تاسىمالداۋ كەزىندە كوپ مولشەردەگى سۋدىڭ جوعالۋىنا اكەلىپ سوعادى. بۇل سۋ قويمالارى اپاتتى جاعدايدا بولعاندىقتان اۋىلدىق ەلدى مەكەندەردى اۋىز سۋمەن قامتاماسىز ەتەتىن بىردەن-ءبىر كوز بولا المايدى. سۋارۋ ءۇشىن سۋ بەرۋ مۇمكىندىگى دە جوق، دەمەك ول داقىلدار ونىمدىلىگىنىڭ تومەن بولۋىنا اكەلەدى»،- دەدى ولگا بۋلاۆكينا سەناتتىڭ جالپى وتىرىسىندا.

سەناتور سونىمەن قاتار، جەردىڭ توزۋى دا وسى اۋداندارداعى اسا ماڭىزدى الەۋمەتتىك-ەكونوميكالىق جانە ەكولوگيالىق پروبلەما بولىپ تابىلاتىنىن اتاپ ءوتتى. دەپۋتات اۋدان حالقىنىڭ ەڭ ماڭىزدى تابىس كوزى – اگرارلىق كاسىپكەرلىك پەن مال شارۋاشىلىعى سالاسىن دامىتۋ بولىپ تابىلاتىنىن ەسكەرە وتىرىپ، بىرقاتار ۇسىنىس ايتتى.

«ءوڭىر تۇرعىندارىنىڭ ومىرىنە قاۋىپ ءتوندىرىپ تۇرعان اۆاريالىق جاعدايعا وراي شقو سۋ قويمالارىنا كەشەندى تەكسەرۋ جۇرگىزۋدى سۇرايمىن. توتەنشە جاعدايلاردىڭ الدىن الۋ ءۇشىن وبلىستىڭ اۆاريالىق جاعدايداعى سۋ وبەكتىلەرىندە قارجىنى ۇكىمەت رەزەرۆىنەن ۋاقتىلى ءبولۋ كەرەك. شەكارا ماڭىنداعى اۋدانداردىڭ ستراتەگيالىق ماڭىزىن ەسكەرە وتىرىپ، اگرارلىق سەكتوردى قولداۋ ءۇشىن سۋ كوزدەرىن تولىققاندى پايدالانۋ پروبلەماسىن جان-جاقتى قاراۋ كەرەك. وسى وبەكتىلەردە جوندەۋ جۇمىستارىنىڭ مەرزىمدەرىن قىسقارتۋ، ءارتۇرلى دەڭگەيدەگى مەملەكەتتىك ورگاندار اراسىنداعى بيۋروكراتيالىق كەدەرگىلەردى ازايتۋ ءۇشىن جوعارىدا اتالعان شارالاردىڭ ىسكە اسىرىلۋىن باقىلاۋ ءۇشىن بىرىڭعاي ورتالىق اتقارۋشى ورگان ايقىندالسىن»، - دەدى ولگا بۋلاۆكينا.

سۋرەت: عالامتوردان

Abai.kz