سارسەنبى كۇنى قازاقستان پرەمەر-ءمينيسترىنىڭ ورىنباسارى – سىرتقى ىستەر ءمينيسترى مۇرات نۇرتىلەۋ قازاقستانعا رەسمي ساپارمەن كەلگەن وڭتۇستىك كورەيانىڭ سىرتقى ىستەر ءمينيسترى پاك جينمەن ەكىجاقتى كەلىسسوز جۇرگىزگەن.
"ەكى ەل ازاماتتارىنىڭ ەڭبەك جانە كوشى-قون قۇقىقتارىن قامتاماسىز ەتۋ ماسەلەلەرى كەلىسسوزدەردىڭ جەكە تاقىرىبى بولدى. مۇرات نۇرتىلەۋ قازاقستان ازاماتتارىنىڭ وڭتۇستىك كورەيادا زاڭدى تۇردە جۇمىسقا ورنالاسۋىن قامتاماسىز ەتۋدىڭ ماڭىزىنا، اسىرەسە قازاقستاندى كورەيانىڭ "ەڭبەككە رۇقسات بەرۋ جۇيەسىنىڭ" تىزىمىنە قوسۋعا نازار اۋداردى" دەپ جازىلعان مينيسترلىك حابارلاماسىندا.
بيىل ءساۋىر ايىندا قازاقستان بيلىگى شەتەلدە جۇمىس ىستەيتىن قازاقستاندىقتاردىڭ قۇقىعىن قورعاۋ ماقساتىندا قازاقستاندىقتار ءجيى باراتىن ەلدەردىڭ ۇكىمەتىمەن، ونىڭ ىشىندە وڭتۇستىك كورەيامەن مەملەكەتارالىق كەلىسىمدەر پاكەتىن ازىرلەپ جاتقانىن حابارلاعان. سول كەزدە "وڭتۇستىك كورەياعا ناپاقا تابۋ ءۇشىن زاڭسىز باراتىن قازاقستاندىقتار بارى، وسى ماسەلەنى شەشۋ قاجەتتىگى" ايتىلعان ەدى.
وڭتۇستىك كورەيا ورتالىق ازيانىڭ ەڭبەك ميگرانتتارى كوپ باراتىن ەلدەر قاتارىنا كىرەدى. ول جاقتا، كەي مالىمەتكە قاراعاندا، كەمىندە 35 مىڭ قازاقستاندىق جۇمىس ىستەيدى. قانشاسى زاڭسىز جۇرگەنى بەلگىسىز. كورەياعا جۇمىس ىزدەپ كەتكەن قازاقستاندىقتاردىڭ كوبى ول ەلدە قازاقستانمەن سالىستىرعاندا الدەقايدا كوپ تابىس تابۋعا بولاتىنىن ايتادى.
2014 جىلى استانا مەن سەۋل ۆيزا كەلىسىمىنە قول قويىپ، قازاقستان ازاماتتارىنا وڭتۇستىك كورەيادا 30 كۇنگە دەيىن ۆيزاسىز جۇرۋگە رۇقسات بەرىلگەن. وسىدان كەيىن جۇمىس ىزدەگەن قازاقستاندىقتار وڭتۇستىك كورەياعا كەتە باستاعان. بۇعان دەيىن سول جاقتا ءجۇرىپ، قيىن جاعدايعا تاپ بولعان قازاقستاندىقتار قۇقىقتارى قورعالمايتىنىنا شاعىمدانعان.
