قىزىلوردا وبلىسىنىڭ ءبىر اۋدانىنداعى 12 مەكتەپتەن 500 ملن تەڭگە جىمقىرىلعان. بۇل جايىندا ءوڭىر اكىمى نۇرلىبەك نالىباەۆ ورتالىق كوممۋنيكاتسيالار قىزمەتىندە وتكەن بريفينگىدە ءمالىم ەتتى. 

بريفينگ كەزىندە جۋرناليست مەملەكەتتىك اۋديت قورىتىندىسى بويىنشا قىزىلوردا وڭىرىندە بيۋدجەت اقشاسىن ءتيىمسىز يگەرۋ بەلەڭ العانىن ايتىپ، جەمقورلىقپەن كۇرەس قالاي ءجۇرىپ جاتقانىن سۇرادى.

«ءبىز قۇقىق قورعاۋ ورگاندارىنىڭ باسشىلارىمەن بىرگە ءبىلىم سالاسىنداعى كوپ تەكسەرۋ جۇرگىزىپ جاتىرمىز. قازىرگى تاڭدا ءبىر اۋداننىڭ وزىندە 12 مەكتەپتە 500 ملن تەڭگەدەن استام قارجى جىمقىرىلعانى بەلگىلى بولدى. سول بويىنشا قازىر ءىس قوزعالدى. تەرگەپ-تەكسەرۋ امالدارى ءجۇرىپ جاتىر. شەشىم قابىلدانادى»، - دەدى نۇرلىبەك نالىباەۆ.

ونىڭ ايتۋىنشا، اتالمىش ماسەلەنى اكىمدىكتىڭ ىشكى ءاۋديتى دە باقىلاپ وتىر.

«رەۆيزيالىق كوميسسيا جانە بار. وسىلار قازىر جۇمىس ىستەپ جاتىر. ءبىلىم سالاسىندا، دەنساۋلىق ساقتاۋ سالاسىندا، بۇكىل سالادا وسىنداي جۇمىس جۇرگىزەمىز. مىسالى، قازىر قوعام بەلسەندىلەرىنىڭ قاتىسۋىمەن بالاباقشالاردا رەيد جاسالىپ جاتىر. شىنىن ايتۋ كەرەك، مەملەكەتتەن 100 بالاعا، 150 بالاعا تاپسىرىس الىپ جاتىر. ال بارىپ قاراساق، وندا 100 بالانىڭ ورنىنا 60-70 بالا جۇرەدى. وسىنى دا انىقتاپ جاتىرمىز. مۇنداعى ماقسات – بيۋدجەتتىڭ قارجىسىن بارىنشا ۇنەمدەۋ، ىسىراپشىلدىققا جول بەرمەۋ، قاراجاتتى ەڭ وزەكتى دەگەن ماسەلەلەرگە باعىتتاپ، حالىقتىڭ ۇسىنىس-تىلەگىن ورىنداۋ»، - دەدى اكىم.

Abai.kz