قىزىلوردا وبلىسىنىڭ اكىمى نۇرلىبەك نالىباەۆ ورتالىق كوممۋنيكاتسيالار قىزمەتىندە وتكەن بريفينگىدە تۋىستارىنىڭ يەلىگىندەگى جەر تەلىمدەرى تۋرالى پىكىر ءبىلدىردى. 

«جەرگىلىكتى حالىقتىڭ ايتۋىنشا، قىزىلوردا وبلىسىندا ءسىزدىڭ تۋىستارىڭىزدىڭ مەنشىگىندە كوپ جەر بار كورىنەدى. ول تۋرالى نە ايتاسىز؟» دەپ سۇرادى باق وكىلى.

وبلىس اكىمى ەگەر تۋىستارىنىڭ ءبىرى زاڭسىز جەر يەمدەنگەن بولسا، زاڭ اياسىندا قايتارىلاتىنىن ايتتى.

«ءسىز ول ماسەلە بويىنشا ماعان جازباشا ساۋال جولداڭىز. بولماسا، قۇقىق قورعاۋ ورگاندارىنا دا بەرسەڭىز بولادى. ولار تەكسەرىپ، سىزگە اقپاراتىن بەرەدى. مەن ءسىزدىڭ سۇراعىڭىزبەن كەلىسپەيمىن. السا، كەزىندە زاڭ اياسىندا بەرىلگەن. قاراپايىم ازاماتتار ۇلەسكەر رەتىندە الىپ جاتىر عوي. ءبىز اكىم بولعانشا، وسىدان 20 جىل بۇرىن العان شىعار. ال باسقا ونداي يەمدەنىپ الىپ قويعان جەرى جوق. جازباشا جولداساڭىز، مىندەتتى تۇردە جاۋاپ بەرەمىز»، - دەدى ايماق باسشىسى.

سونداي-اق، ول وڭىردە پايدالانىلماي جاتقان جەر تەلىمدەرىن قايتارۋ جۇمىسى قارقىندى ءجۇرىپ جاتقانىن اتاپ ءوتتى.

«باعانا باياندامامدا ايتىپ كەتتىم. بىلتىر 157 مىڭ گەكتاردى مەملەكەت مەنشىگىنە قايتاردىق. بيىل 200 مىڭ گەكتاردان ارتىق جەردى قايتارامىز دەپ جوسپارلادىق. ونىڭ ىشىندە ءبىزدىڭ تۋىس بولا ما، باسقا بولا ما، زاڭسىز السا، مىندەتتى تۇردە مەملەكەتكە قايتارىلادى. ونى مەنەن باسقا دا ورگاندار قاراپ، قاداعالاپ وتىر»، - دەدى نۇرلىبەك نالىباەۆ.

Abai.kz