تامارا دۇيسەنوۆا پرەمەر-ءمينيستردىڭ ورىنباسارى – ەڭبەك جانە حالىقتى الەۋمەتتىك قورعاۋ ءمينيسترى بولىپ تاعايىندالدى. 

«مەملەكەت باسشىسىنىڭ جارلىعىمەن تامارا بوسىمبەكقىزى دۇيسەنوۆا قازاقستان رەسپۋبليكاسى پرەمەر-ءمينيسترىنىڭ ورىنباسارى – ەڭبەك جانە حالىقتى الەۋمەتتىك قورعاۋ ءمينيسترى بولىپ تاعايىندالدى»، - دەلىنگەن قۇجاتتا.

ايتا كەتەيىك، تامارا بوسىمبەكقىزى 1965 جىلى 11 قاڭتاردا وڭتۇستىك قازاقستان وبلىسىندا تۋعان.

1987 جىلى تاشكەنت حالىق شارۋاشىلىعى ينستيتۋتىن ءبىتىردى، ماماندىعى – ينجەنەر-ەكونوميست، ەكونوميكا عىلىمدارىنىڭ كانديداتى.

ەڭبەك جولىن 1988 جىلى ينستيتۋتتى اياقتاعاننان كەيىن وڭتۇستىك قازاقستان وبلىسى سارىاعاش اۋدانىنداعى ورتا مەكتەپتىڭ ينفورماتيكا ءپانىنىڭ مۇعالىمى قىزمەتىنەن باستادى.

1988-1992 جىلدارى وزبەك سسر-ءنىڭ مەملەكەتتىك جوسپارلاۋ كوميتەتىنىڭ ەكونوميكا عىلىمي زەرتتەۋ ينستيتۋتىنىڭ ەكونوميسى بولىپ جۇمىس ىستەدى.

1992-1993 جىلدارى – وڭتۇستىك قازاقستان وبلىسى سارىاعاش اۋداندىق اكىمشىلىگىنىڭ اعا ەكونوميسى; 1993-1994 جىلدارى – «پەريزات-حولدينگ» كومپانياسىنىڭ ءبولىم باسشىسى; 1994-1997 جىلدارى – سارىاعاش اۋدانى اكىمىنىڭ كەڭەسشىسى، ورىنباسارى، ءبىرىنشى ورىنباسارى; 1997-1999 جىلدارى – شىمكەنت قالاسى اكىمىنىڭ ءبىرىنشى ورىنباسارى; 1999-2002 جىلدارى – وڭتۇستىك قازاقستان وبلىسى اكىمىنىڭ ورىنباسارى; 2002-2006 جىلدارى – قازاقستان رەسپۋبليكاسى ەڭبەك جانە حالىقتى الەۋمەتتىك قورعاۋ مينيسترلىگىنىڭ ۆيتسە - ءمينيسترى; 2006 - 2008 جىلدارى - وڭتۇستىك قازاقستان وبلىسى اكىمىنىڭ ورىنباسارى; 2008 – 2013 جىلدارى قازاقستان رەسپۋبليكاسى ەڭبەك جانە حالىقتى الەۋمەتتىك قورعاۋ مينيسترلىگىنىڭ جاۋاپتى حاتشىسى; ەڭبەك جانە حالىقتى الەۋمەتتىك قورعاۋ ۆيتسە-ءمينيسترى (02.2013-06.2013); ەڭبەك جانە حالىقتى الەۋمەتتىك قورعاۋ ءمينيسترى (2013-2014); قر دەنساۋلىق ساقتاۋ جانە الەۋمەتتىك دامۋ ءمينيسترى (2014-2017); ەڭبەك جانە حالىقتى الەۋمەتتىك قورعاۋ ءمينيسترى (2017-2018); «Nur Otan» پارياسىنىڭ حاتشىسى (2018-2019). «ەڭبەك رەسۋرستارىن دامىتۋ ورتالىعى» اق جەتەكشىسى (2019-2020).

2020 جىلدىڭ مامىرىندا پرەزيدەنت كومەكشىسى-پرەزيدەنت اكىمشىلىگىنىڭ وتىنىشتەردى قاراۋدى باقىلاۋ ءبولىمىنىڭ مەڭگەرۋشىسى بولىپ تاعايىندالعان.

2022 جىلى 11 ساۋىردەن بەرى ەڭبەك جانە حالىقتى الەۋمەتتىك قورعاۋ ءمينيسترى قىزمەتىن اتقارىپ كەلدى.

«قۇرمەت» وردەنىمەن، «قازاقستان رەسپۋبليكاسىنىڭ تاۋەلسىزدىگىنە 10 جىل» (2001), «قازاقستان كونستيتۋتسياسىنا 10 جىل» (2005) مەدالدارىمەن ماراپاتتالعان.

Abai.kz