جينالعاندار اراسىندا جۇمىسسىز بوس تۇرىپ قالعان "التىنالماس" كومپانياسىنىڭ كەنشىلەرى دە بار. ولار پرەمەر-ءمينيستردىڭ ءبىرىنشى ورىنباسارى رومان سكليارعا ۇندەۋ جولدادى. تۇرعىندار وسىنداعى شاحتانى ىسكە قوسىپ، ودان جەراستى سۋىن سورعىزۋدى تالاپ ەتتى. سونىمەن بىرگە اۋىل ماڭىنداعى كەن بايىتۋ فابريكاسىن وزگە جاققا كوشىرۋدى سۇرادى. نارازىلار ءتۇن ورتاسى بولسا دا، ورىندارىنان قوزعالمادى. ءبىرى مادەنيەت سارايىنىڭ عيماراتىندا، قالعاندارى كوشەدە تۇردى. وقيعا ورنىندا بيلىك وكىلدەرى مەن ءتارتىپ ساقشىلارى كوپ ءجۇردى.

اۋىلدا ءوندىرىستى قايتا ىسكە قوسۋ ماسەلەسى ەكى جىلدان بەرى كوتەرىلىپ كەلەدى. جينالعاندار ۇندەۋىندە جۋىردا پرەزيدەنتتىڭ ايماققا ساپارى كەزىندە قاسىم-جومارت توقاەۆ كەنىشتەگى پروبلەمانى شەشۋدى تاپسىرعانىن ەسكە سالدى.

"سول كەزدەن باستاپ بەستوبە تۇرعىندارىمەن، كەنشىلەرمەن، مەملەكەتتىك ورگانداردىڭ وكىلدەرىمەن بەس كەزدەسۋ ءوتتى. جۇمىسشىلار مەن حالىقتىڭ تالاپ-تىلەگى ءالى ورىندالمادى، شاحتاداعى سۋ سورىلمادى. كۇننەن كۇنگە ونداعى سۋ كوبەيىپ جاتىر. ءبىزدىڭ اۋىلعا كەلۋىڭىزدى سۇرايمىز" دەدى تۇرعىندار رومان سكليارعا جولداعان ۇندەۋىندە.

– ماسەلەنى شەشپەيىنشە تارامايمىز. شاحتالاردى ىسكە قوسۋدى بۇگىن شەشسەك، جاقسى بولار ەدى. ەگەر ول ءۇشىن بىرنەشە كۇن كەرەك بولسا، وعان دا دايىنبىز، – دەدى كەيىن قۋعىنعا ۇشىراماس ءۇشىن اتى-ءجونىن كورسەتپەۋدى وتىنگەن جۇمىسشىلاردىڭ ءبىرى ازاتتىق تىلشىسىنە.

بۇعان دەيىن "التىنالماس" كومپانياسى كەنىش جۇمىسىن توقتاتقان كەزدە جۇمىسشىلار ناۋرىزدىڭ اياعىندا نارازىلىققا شىققان بولاتىن. ولار جۇمىس ورىندارىن ساقتاپ قالۋدى، شاحتالاردان سۋ سورعىزۋدى، كەنىشكە جاڭا ينۆەستور كەلگەنشە قىزمەتكەرلەرگە ورتاشا جالاقى تولەپ تۇرۋدى تالاپ ەتتى.

شاحتا 2021 جىلعى شىلدەدە جۇمىسىن توقتاتتى. سودان بەرى 1200 ادام جۇمىسسىز قالدى. العاشىندا ولارعا ورتاشا جالاقى تولەنىپ كەلدى، بيىل قاڭتاردان باستاپ تولەمدەر ەڭ تومەنگى جالاقى دەيگەيىنە دەيىن ازايتىلدى.

سول ۋاقىتتان بەرى شاحتالارداعى سۋدى سورۋ توقتاتىلعان. كومپانيا "سۋدى توگەتىن جەرىمىز جوق" دەسە، جۇمىسشىلار مۇنى "حالىقتى التىندى اشىق ادىسپەن وندىرۋگە يتەرمەلەۋ ءۇشىن جاسالعان ارەكەت" دەگەن.

بىلتىر كوكتەمدە "التىنالماس" باسشىلىعى بەستوبەدەگى شاحتالار مەن زاۋىتتاردىڭ جۇمىسىن توقتاتۋدان باسقا امال قالماعانىن مالىمدەدى. ەندى كومپانيا ەكى جولدىڭ ءبىرىن تاڭداۋى كەرەك. ءبىرىنشى جاعدايدا شاحتالار ۇزاق جىلعا كونسەرۆاتسيالاۋعا قويىلادى. تاعى ءبىر شەشىم – جاڭا كارەر سالىپ، اۋىلدىڭ ءبىر بولىگىن سوندا كوشىرۋ.

*سۋرەت الەۋمەتتىك جەلىدەن الىندى

Abai.kz