قازاقستاندىق جاس جازۋشىلار مەن اقىندار ءۇشىن پرەزيدەنتتىك ارناۋلى ادەبي سىيلىق تاعايىندالدى.

 بيىل جاس قالامگەرلەرگە مەملەكەتتىك قولداۋ كورسەتۋ، دارىندى اقىن-جازۋشىلاردىڭ جاڭا بۋىنىن قالىپتاستىرۋ ماقساتىندا تۇڭعىش رەت پرەزيدەنتتىك ادەبي سىيلىق تاعايىندالدى. ادەبي سىيلىققا 18-35 جاس ارالىعىنداعى قالامگەرلەر بۇرىن حالىقارالىق جانە ۇلتتىق بايقاۋلارعا قاتىسپاعان تۋىندىلارىمەن ۇمىتكەر بولا الادى.

ءوتىنىم «پروزا»، «پوەزيا»، «دراماتۋرگيا» جانە «بالالار ادەبيەتى» نوميناتسيالارى بويىنشا قابىلدانادى. جاس قالامگەرلەر 2023 جىلدىڭ 1 ماۋسىمىنان باستاپ 30 ماۋسىمىنا دەيىن ۋاكىلەتتى ورگانعا قاعاز جانە ەلەكتروندىق تۇردە كەلەسى قۇجاتتاردى جىبەرۋى ءتيىس:

پرەزيدەنتتىك سىيلىق الۋعا ءوتىنىم;

ۇمىتكەردىڭ جەكە كۋالىگىنىڭ كوشىرمەسى;

قازاقستان جازۋشىلار وداعىنان مىنەزدەمە;

پرەزيدەنتتىك سىيلىققا ۇمىتكەر جاريالاعان نە ۇمىتكەر تۋرالى ماقالالاردىڭ، جاريالانىمداردىڭ كوشىرمەسى (بار بولسا);

ەكىنشى دەڭگەيدەگى بانكتە بانك شوتىنىڭ بار ەكەنىن راستايتىن انىقتامانىڭ كوشىرمەسى;

ۇمىتكەردىڭ جەتىستىكتەرىن ايعاقتايتىن وزگە دە ماتەريالدار (بار بولسا).

پرەزيدەنتتىك سىيلىق ءار نوميناتسيا بويىنشا ءبىر ۇمىتكەرگە عانا تاعايىندالادى. سىيلىقتى قايتا تاعايىنداۋعا جول بەرىلمەيدى. ۇمىتكەر ءبىر نوميناتسياعا عانا ءوتىنىم ۇسىنا الادى.

پرەزيدەنتتىك سىيلىققا يە بولعان تۇلعالارعا «قازاقستاندىق جاس جازۋشىلار مەن اقىندار ءۇشىن پرەزيدەنتتىك ارناۋلى ادەبي سىيلىقتىڭ لاۋرەاتى» اتاعى بەرىلەدى، ديپلوم، توسبەلگى جانە اقشالاي سىياقى ء(ار نوميناتسياعا 4,1 ملن تەڭگە) تاپسىرىلادى.

تولىعىراق اقپارات قر مادەنيەت جانە سپورت مينيسترلىگىنىڭ رەسمي سايتىندا ورنالاسقان.

بايلانىس تەلەفوندارى:     +7 (7172) 74 04 08, +7 (7172) 74 03 84

رەداكتسيادان: شىعارماشىلىقپەن شۇعىلداناتىن جاستار ەلىمىزدە ءتۇرلى بايقاۋلارعا قاتىسىپ، مەملەكەت تاراپىنان قولداۋ كورىپ كەلەدى. ول بايقاۋلار تالاي جاس دارىننىڭ باعىن اشتى، ەسىمىن ەلگە ايگىلى ەتتى. ءوزىنىڭ شىعارماشىلىق قابىلەتىنە دەگەن سەنىمىن ارتتىرىپ، شابىتتاندىردى، قانات بايلادى. ال، ەندى مىنا سىيلىقتىڭ – پرەزيدەنتتىك سىيلىقتىڭ تالابى دا كۇشتى، ءجونى دە بولەك سياقتى. ويتكەنى بۇل سىيلىقتى اتالعان نوميناتسيالار بويىنشا دارا شاپقان دارىندى جاس قالامگەر عانا يەلەنەدى. دارا بولعاندىقتان ونىڭ سىيلىقتى جەڭىپ العان شىعارماسى ماقتاۋلى پروزانىڭ، پوەزيانىڭ، دراماتۋرگيانىڭ ءبىرى بولىپ قالماي، ەل ءىشىن ەلەڭ ەتكىزىپ، جالت قاراتاتىنداي قۇبىلىس بولۋى كەرەك.

ءبىز تالانتتارعا باي ەلمىز. ەندەشە باعىڭدى سىنا، قاپى قالما، جارىسقا ءتۇس، جاس قالام يەسى!

Abai.kz