«جالكو، چتو لي؟»
پرەزيدەنت توتەنشە جاعدايلار ءمينيسترى شىرەني تالتايعانۇلى ءميريندى قابىلدادى.
– ءسىز مينيستر بولعالى، ورتتەن كوز اشپادىق. سەمەي وڭىرىندە تاعى دا الاپات ءورت. ءسىز نەگە ول جاققا بارمادىڭىز؟ - دەپ سۇرادى پرەزيدەنت.
– مونشادا ەدىم، كەشىرىڭىز، پرەزيدەنت مىرزا، - دەدى مينيستر كۇمىلجىپ.
– يا، سىلتاۋىڭىز كوپ ايتەۋىر. نەگە الدىن-الا ءورت وشاعىن انىقتامادىڭىزدار؟
– ءوزىڭىز بىلەسىز، بۇل ءورت دەگەننىڭ ەجەلدەن ءتىلى جوق. مىلقاۋ. بىزگە ايتپايدى. «ءورت - ءتىلسىز جاۋ» ەكەنىن ءبارىمىز بىلەمىز. بۇل ءورت دەگەن نە قازاقشا، نە ورىسشا سويلەي المايدى. ورتكە ءتىل ءبىتىرۋ ءۇشىن، بيۋدجەتتەن اقشا بولىنسە دەگەن ۇسىنىسىم بار. ورتكە ونىڭ «كلاستاسى» جەل كومەكتەسەدى. جەل ونى ۇرلەپ، ەكەۋى ويناي باستايدى. جەلدى بولدىرماۋ تۋرالى ارنايى زاڭ قابىلدانباسا، جەل، داۋىل دەگەندەر قۇتىرىپ ءبىتتى.
– ءسىز نە ايتىپ كەتتىڭىز؟ مينيستر بولا تۇرىپ، نەمقۇرايدىلىق تانىتتىڭىز! تەحنيكالار ەسكىرگەن، ورتشىلەرگە ارنايى كيىم دە بەرىلمەگەن! قانشاما ادام قازا بولدى! ال، ءسىز... بۇگىننەن باستاپ بوسسىز!
مينيستر ەسىكتەن شىعىپ بارا جاتىپ:
– كەشىرىڭىز، بۇكىل ەل بولىپ، ورتكە ءبىر-ءبىر تۇكىرىپ كەتسە بولادى عوي؟ سىزدەردە قالاي ەدى؟ «كوپ - تۇكىرسە كول، تۇكىرمەسە - ءنول!» - دەگەن بار ەمەس پە؟ داۆايتە، دەپۋتاتتار دا سوندا بارىپ، تۇكىرىپ كەتسىن! جالكو چتو لي؟ - دەدى. كورەسىزدەر، مايدا شوپاق باستىقتار سوتتالىپ، ەكس-مينيستر ميىعىنان كۇلىپ جۇرەدى ءالى!
ايتپاقشى، ايتقان جەردەن اۋلاق، ءورت بولا قالسا، تۇكىرىپ كەتىڭىزدەرشى؟
مۇحتار شەرىم
Abai.kz
