AMANAT پارتياسىنىڭ ەلەكتورالدى ۋادەلەرىنىڭ نەگىزىندە كىتاپحانا قىزمەتكەرلەرىنىڭ ايلىق جالاقىسىن ارتتىرۋ قاراستىرىلعان. الايدا، بۇگىندە بۇل شەشىم تەك مادەنيەت سالاسىنا قاراستى 4 مىڭنان استام كىتاپحاناشىلاردى عانا قامتىپ، قالعان 8 مىڭ پەداگوگيكالىق سالاعا جاتاتان كىتاپحانا قىزمەتكەرلەرىنە تارالماي وتىر. بۇل تۋرالى بۇگىن ءماجىلىس دەپۋتاتى ەركىن ءابىل پالاتانىڭ جالپى وتىرىسىندا قازاقستان رەسپۋبليكاسى پرەمەر-ءمينيسترىنىڭ ورىنباسارى – ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆاعا ءوزىنىڭ دەپۋتاتتىق ساۋالىن جولدادى.

دەپۋتاتتىڭ ايتۋىنشا، ساۋالعا جالپى ەلىمىزدىڭ ءبىلىم سالاسىنا باعىنىستى كىتاپحانا قىزمەتكەرلەرىنىڭ، ونىڭ ىشىندە قوستاناي وبلىسىنىڭ  مەكتەپ كىتاپحاناشىلارىنىڭ ۇجىمدىق ۇندەۋى سەبەپ بولدى.

مىسالى، مادەنيەت سالاسىنىڭ كىتاپحاناشىلارى نەگىزگى قۇرامعا جاتادى جانە ەڭبەكاقىنى ا (مەڭگەرۋشىلەر) جانە ۆ (قاتارداعى كىتاپحاناشىلار) تولەم توپتارى بويىنشا الىپ، ولارعا ساناتى ءۇشىن قوسىمشا اقى تولەنەدى. زياتكەرلىك مەكتەپتەرىندەگى كىتاپحاناشىلار پەداگوگ-كىتاپحاناشى رەتىندە اتتەستاتسيادان وتكەن. ال ورتا ءبىلىم ۇيىمدارىنىڭ كىتاپحاناشىلارى 2016 جىلدىڭ 1 قاڭتارىنان باستاپ بىلىكتىلىك ساناتى ءۇشىن قوسىمشا تولەمنەن ايرىلىپ، مەكتەپ كىتاپحانالارىنىڭ مەڭگەرۋشىلەرى كومەكشى پەرسونالعا جاتقىزىلىپ، س1 شارۋاشىلىق بولىمشە مەڭگەرۋشىسى ەڭبەك اقى توبىنا ەنگىزىلگەن.

قازاقستان رەسپۋبليكاسىندا 8 مىڭعا جۋىق مەكتەپ كىتاپحاناشىسى جۇمىس ىستەيدى، ولاردىڭ 30 پايىزى شاعىن جيناقتالعان مەكتەپتەردە تولىق ەمەس ستاۆكادا، ولار 3,5 ميلليون مەكتەپ وقۋشىسى مەن جارتى ميلليون مۇعالىمگە قىزمەت كورسەتەدى. ەڭ جوعارى ەسەپپەن العاندا 136 مىڭ تەڭگەدەن، بارلىق شەگەرىمدەردەن كەيىن، كىتاپحانا مەڭگەرۋشىسى 96 مىڭ تەڭگە قولىنا ايلىق الادى. جالپى ءبىلىم بەرەتىن مەكتەپتەردىڭ شتاتتارىنا سايكەس 21 سىنىپ جيناقتالسا، ديرەكتوردىڭ ورىنباسارلارى، پسيحولوگ، مەدبيكە، بۋحگالتەردىڭ 1,5 ستاۆكاسى ەنگىزىلگەن. بىراق بۇل نورما مەكتەپ كىتاپحاناشىسىنا قولدانىلمايدى، ولار ءۇشىن قوسىمشا ستاۆكا تەك 30 سىنىپ جينالسا ەنگىزىلەدى. بۇل بۇگىندە جۇمىسىنىڭ جۇكتەمەسى جوعارى كىتاپحانا قىزمەتكەرلەرى ءۇشىن سالاداعى كادرلاردىڭ تاپشىلىعى مەن تۇراقتاماۋىنا الىپ كەلۋدە.

وسىعنا سايكەس، اMANAT  پارتياسى فراكتسياسى كەلەسى ۇسىنىستاردى ەنگىزەدى:

بىرىنشىدەن، مەكتەپ كىتاپحاناشىلارىنىڭ ەڭبەكاقىسىن مادەنيەت سالاسىنداعى كىتاپحانالارداعى ەڭبەكاقى دەڭگەيىنە دەيىن ارتتىرۋ تۋرالى ماسەلەنى شەشۋىڭىزدى، ۇكىمەتتىڭ ءتيىستى قاۋلىلارىنا وزگەرىس ەنگىزۋىڭىزدى سۇرايمىز.

ەكىنشىدەن، مەكتەپ كىتاپحاناسىنىڭ 1 قىزمەتكەرىنە جۇكتەمە نورماتيۆتەرىن قايتا قاراپ، مەكتەپ كىتاپحاناسى مەڭگەرۋشىسىنىڭ 14 سىنىپ جيناقتالسا 1 ستاۆكا، 21 سىنىپ  جيناقتالسا - 1,5 ستاۆكا، 28 كلاسس  جيناقتالسا - 2 ستاۆكا ولشەمشارتتارىن بەكىتۋ وزەكتى.

ۇشىنشىدەن، وقۋ قورىمەن جۇمىس ىستەگەنى ءۇشىن 30 پايىز قوسىمشا تولەمدەردى نەگىزگى لاۋازىمدىق جالاقىسى ەمەس لاۋازىمدىق جالاقىنان ەسەپتەپ، ەسەپتەۋ ءتارتىبىن قايتا قاراستىرۋ ابزال.

Abai.kz