بەلارۋستىڭ اۆتوريتارلى باسشىسى الەكساندر لۋكاشەنكو "روسسيا 1" تەلەكانالىنىڭ جۇرگىزۋشىسى ولگا سكابەەۆاعا بەرگەن سۇقباتىندا بىلتىر ناۋرىز ايىندا رەسەي پرەزيدەنتى ۆلاديمير پۋتين قىرىمنىڭ مارتەبەسى جونىندە ۋكراينامەن كەلىسسوز جۇرگىزۋگە دايىن بولدى دەدى.  

لۋكاشەنكونىڭ سوزىنشە، پۋتين وعان دەلەگاتسيا وكىلدەرىمەن كەلىسىلگەن ۋكراينامەن بەيبىت كەلىسسوز جونىندەگى جوباسىن بەرگەن. قۇجاتتا اننەكسيالانعان قىرىمدى "ۇزاق مەرزىمگە جالعا الۋ" مەن دونباسستى تۇركيادا وتەتىن رەسەي مەن ۋكراينا باسشىلارى اراسىنداعى كەلىسسوزدە تالقىلاۋ ۇسىنىلعان.

"ەگەر رەسەي بۇل قۇجاتتى قازىر وقىسا، جىندانىپ كەتەر ەدى. سەبەبى بۇل رەسەيگە تىپتەن دە پايدا اكەلمەيتىن ەدى. بىراق رەسەي كەلىسكەن ەدى", - دەيدى لۋكاشەنكو.

بەيبىت كەلىسىم جونىندەگى جوبا تۋرالى ۋكراينا پرەزيدەنتى كەڭسەسىنىڭ بۇرىنعى كەڭەسشىسى الەكسەي ارەستوۆيچ ايتتى. ونىڭ سوزىنشە، 2022 جىلدىڭ كوكتەمىندە ورىس ارمياسى كوپ شىعىندالعاننان كەيىن، رەسەي بۇرىنعى تالاپتارىنان باس تارتقان، ونىڭ ىشىندە قىرىم مەن دونباسستى باقىلاۋ دا كىرەدى. ول تالاپتاردىڭ ىشىندە ۋكراينا قارۋلى كۇشتەرىنىڭ سانىن 50 مىڭ ادامعا دەيىن قىسقارتىپ، ۋكراينادا ورىس ءتىلى مارتەبەسىن ەكىنشى مەملەكەتتىك ءتىل دەڭگەيىندە ەنگىزۋ بولدى.

ارەستوۆيچتىڭ سوزىنشە، كەلىسسوز جۇرگىزەتىن تاراپتار پۋتين مەن زەلەنسكيدىڭ كەزدەسۋىنە دايىندالىپ جاتتى. بىراق سوڭعى ساتتە ۋكراينا پرەزيدەنتى رەسەيمەن كەلىسسوز جۇرگىزۋدەن باس تارتتى. وعان باستى سەبەپ بولعان - بۋچا قالاسىنداعى قايعىلى وقيعا، ونداعى ازاپتاپ ولتىرىلگەن بەيبىت تۇرعىندار.

رەسەي ۋكرايناعا باسىپ كىرگەننەن كەيىن، ورىس جانە ۋكراين دەلەگاتسياسى ءبىراز ۋاقىت بەلارۋس جانە تۇركيادا كەلىسسوز جۇرگىزدى.

ستامبۇلدا كەزدەسۋ كەزىندە الدىن الا كەلىسىلگەن قۇجاتقا سايكەس، ۋكراينا ناتو-عا كىرۋدەن باس تارتۋى قاجەت جانە قىرىم مارتەبەسىن شەشۋدى كەيىنگە قالدىرىلادى. بىراق بۇل قۇجاتتارعا قول قويىلمادى.

سارسەنبى كۇنى رەسەي پرەزيدەنتىنىڭ ءباسپاسوز حاتشىسى دميتري پەسكوۆ الەكساندر لۋكاشەنكونىڭ قىرىمعا قاتىستى ايتقانىن تەرىسكە شىعاردى. "جوق، ولاي ەمەس. قىرىم - رەسەيدىڭ ءبىر بولشەگى، بۇل رەسەيلىك اۋماق", - دەدى پەسكوۆ.

بىلتىر كيەۆ وبلىسىنداعى بۋچا قالاسىن رەسەي باسىپ الىپ، ءبىر ايداي ۇستاپ، كەيىن ۋكراينا اسكەرى ازات ەتكەن. بۋچا قالاسىنان ازاپتاپ ولتىرىلگەن جۇزدەگەن ادامنىڭ دەنەسى تابىلدى. بۇل وقيعانىڭ ءتىرى كۋاگەرلەرى دە بولدى. ۋكراينا رەسەيدى اسكەري قىلمىس جاسادى دەپ ايىپتادى.

Abai.kz